Тошкент вилояти, Самарқанд ва Жиззах шаҳарларида газ тармоқлари 2 босқичли тизимга ўтказилади

Миллий матбуот марказида «Ўзтрансгаз» акциядорлик жамияти томонидан республиканинг чекка ҳудудлари ва қишлоқ аҳолисини табиий ҳамда суюлтирилган газ билан узлуксиз таъминлаш борасида белгиланган вазифалар ижросига бағишланган матбуот анжумани ўтказилди. Бу ҳақда ЎзА хабар бермоқда.

Унда аҳолига мунтазам ва узлуксиз газ маҳсулотларини етказиб бериш борасида белгиланган чора-тадбирларни узвий равишда ташкил этиш, соҳада олиб борилаётган ишлар самарадорлигини ошириш, куз-қиш мавсумини кўнгилдагидек ўтказиш ҳақида сўз борди.

Жорий йил мобайнида аҳолини 634 минг 868 дона газ баллонлар билан таъминлаш белгиланган бўлса, ҳозирги кунга қадар 183 минг 962 донаси етказиб берилди.

Газ етиб бориши қийин бўлган ҳудудлардаги хонадонларга суюлтирилган газ тарқатиш орқали 182 мингга яқин хонадоннинг газ таъминоти тубдан яхшиланади. Тизимдаги корхоналар орқали истеъмолчиларнинг табиий газга бўлган эҳтиёжини тўла қондириш мақсадида 2018 йилда жами 37,7 миллиард метр куб табиий газ етказиб бериш режалаштирилган.

2018—2019 йилларнинг куз-қиш даврида республика иқтисодиёт тармоқлари ва ижтимоий соҳа объектларини барқарор ишлашга комплекс тайёрлаш бўйича чора-тадбирлар режаси ишлаб чиқилган. Унга мувофиқ, жорий йилнинг 1-октябрига қадар 41 километр газ қувурларини мукаммал таъмирлаш, 108,4 километр газ қувурларини реконструкция қилиш кўзда тутилган.

Фаол тадбиркорлик, инновацион ғоялар ва технологияларни қўллаб-қувватлаш йилида «Ўзтрансгаз» АЖ томонидан Тошкент вилоятининг Қибрай, Юқори Чирчиқ туманлари ҳамда Самарқанд, Жиззах шаҳарларидаги газ тармоқларини мукаммал ва жорий таъмирлаш, модернизация қилиш орқали газ тармоқларини 2 босқичли тизимга ўтказиш ишлари олиб борилмоқда. Ўз навбатида, ушбу техник чора-тадбирлар натижасида газ тармоқларида йўқотишлар миқдори кескин камайиб, истеъмолчиларга белгиланган муддат ва кўрсаткичлар бўйича узлуксиз табиий газ етказиб бериш, шунингдек, газ тақсимотида автоматлашган тизим жорий қилинади.

Матбуот анжуманида истеъмолчилар томонидан содир этилаётган қоидабузарликлар ҳақида ҳам маълумот тақдим этилди. Унга кўра, «Ўзтрансгаз» акциядорлик жамияти Бош прокуратура ҳузуридаги Мажбурий ижро бюроси билан ҳамкорликда олиб борилган ўрганишлар натижасида табиий газдан фойдаланишда 2 минг 599 қоидабузилиши билан боғлиқ ҳолат аниқланган.