21 июнь куни Ўзбекистон Бош вазири Абдулла Арипов раислигидаги бўлиб ўтган йиғилишда халқ таълими тизимини тубдан ислоҳ қилиш чора-тадбирлари, вазирликнинг янги раҳбарияти олдида турган вазифалар, соҳадаги муаммо ва камчиликлар санаб ўтилди. Йиғилишда «Дарё» мухбири Севара Нишонова ҳам иштирок этди.
Бош вазирнинг таъкидлашича, ўтган йиллар мобайнида чет тилларни ўқитиш соҳасида қатор камчиликлар кўзга ташланди. Жумладан, асосий урғу инглиз тилига берилиши натижасида немис, француз ва бошқа чет тилларини ўргатиш эътибордан четда қолди.
«Бизда немис, француз тилларига ихтисослаштирилган кучли мактаблар бўларди. Уларда ўз соҳасининг ҳақиқий маънодаги билимдонлари фаолият юритар эди. Лекин биз инглиз тилига кўпроқ урғу бериб, уларни ҳам қайта тайёрлов орқали инглиз тили ўқитувчисига айлантирдик.
Ҳозирги кунда айниқса чекка ҳудудлардаги мактабларда чет тилларини, рус тилини ўргатиш талабга жавоб бермайди.
Чиноздаги мактаблардан бирида бир ҳолатга гувоҳ бўлдим. Маданий оқартирув техникумини битирган мутахассис олти ойлик инглиз тили курсини битириб, сертификат билан инглиз тилидан дарс бериб юрибди.
Хорижда мактабни битираётган ўқувчи тўртта хорижий тилни билади. Биз борини йўқ қилдик, ўрнига янгисини қурмадик», — дейди Абдулла Арипов.
Изоҳ (0)