«Дарё» мухбири Азизжон Эрматов ўтган йилнинг 22—23 июнь кунлари Президентнинг Марғилонга ташрифидан сўнг шаҳарда нималар ўзгарганини таҳлил қилди.
Ўзбекистон Президенти Шавкат Мирзиёев ўтган йил 22—23 июнь кунлари Фарғона вилоятига ташрифи чоғида Марғилон шаҳар маданият ва истироҳат боғини реконструкция қилиш, миллий ҳунармандлик марказини ташкил этиш ва туризмни ривожлантириш дастури тақдимоти билан танишиб, тегишли топшириқлар берган эди. Мазкур топшириқлар ижроси доирасида Марғилонда янги саноат корхоналари, замонавий уй-жойлар, инфратузилма объектлари бунёд этилди.
Шаҳардаги маданият ва истироҳат боғига атоқли адиб Эркин Воҳидов номи берилиб, қайта реконструкция қилинди. Истироҳат боғининг майдони 9 гектардан 16 гектарга кенгайтирилди. Эркин Воҳидов номидаги музей, ёзувчилар уюшмасининг вилоят бўлими биноси, ижодкорлар хиёбони, Эркин Воҳидов номидаги ёш ижодкорлар мактаб-интернати, 2 минг кишилик амфитеатр, Нуронийлар маскани замонавий меъморчилик андозалар асосида бунёд этилди. Замонавий аттракционлар ўрнатилди. Мевали ва манзарали дарахтлар экилди. Боғнинг кириш қисмида ёзувчи-ижодкорлар хиёбони ташкил этилиб, шу ерда Эркин Воҳидов ҳайкали ўрнатилди.
Шаҳарнинг 17 гектар ер майдони ҳунармандлар шаҳарчаси қурилиши учун ажратилди. Айни пайтда бу ерда меҳмонхона, карвонсарой, дам олиш ва спорт мажмуалари, маиший ва хизмат кўрсатиш шохобчалари қад ростламоқда.
Маълумот учун, айни пайтда Президент Шавкат Мирзиёевнинг Фарғона вилоятига навбатдаги ташрифи давом этмоқда. Президент ташриф доирасида Марғилон шаҳрида амалга оширилган бунёдкорлик ишлари билан ҳам танишиши кутилмоқда.
Изоҳ (0)