Ўзбекистон футбол ассоциацияси «Бунёдкор» стадионини ташкилот Ижроқўми қарорига кўра «Миллий стадион» деб ўзгартирди. Бу ҳақда ташкилот матбуот хизмати хабар берди.
Қайд этилишича, унда Ўзбекистон миллий ва олимпия терма жамоалари ўзининг уй учрашувларини ўтказиш белгилаб қўйилди. «Миллий стадион», шунингдек, Ўзбекистон Кубогининг юқори босқичли ўйинларига, халқаро даражадаги футбол учрашувларига мезбонлик қилади. У мамлакатнинг бош аренасига айланади.
Стадионга туташ ҳудудда барпо этилган футбол академияси эса Ўзбекистон футбол ассоциациясига қарашли академияга айлантирилади. Таъкидланишича, режага кўра яқин вақт ичида Ўзбекистоннинг 14 та ҳудудий бирлигида 1 тадан болалар ва ўсмирлар футбол академиялари иш бошлайди. Мазкур академияларни эса ЎФА қошидаги республика футбол академияси бирлаштириб туради.
Маълумот учун эндиликда собиқ «Бунёдкор» стадиони 34 минг томошабинга мўлжалланган бўлиб, у 2012 йил августда фойдаланишга топширилган(қурилиш ишлари 2009 йилда бошланган эди). Стадионнинг очилиши маросими 2012 йил 28-сентябрда бўлиб ўтган.
«Бунёдкор» стадионидаги илк расмий ўйин эса 2013 йил 26 мартда Ўзбекистон ҳамда Ливан терма жамоалари ўртасида бўлиб ўтган.
Изоҳ (0)