Қирғизистонлик Missis World унвони соҳибаси Сания Шокированинг ҳалокати билан боғлиқ илк суд мажлисларидан бирида у ўтирган машинани ким бошқаргани маълум бўлди, деб ёзади «Nur.kz».
Ҳайдовчи унинг Чингиз исмли қаллиғи бўлган. Айни пайтда у Бишкек травматология ва ортопедия марказида ётибди. Кўчма суд мажлиси ўша ерда бўлиб ўтган. Мажлисда қатнашган журналистлар йигит соппа-соғ ҳолатда эканлиги ва мустақил ҳаракатланаётганини қайд этган.
ЙТҲдан кейин Чингизнинг ўзи тиббий муассасага келиб, унга ёрдам кўрсатишларини сўраган. Унинг ўмров суяги синганлигини аниқлаб, операция ўтказиш кераклигини айтишган.
Биринчи суд мажлисида у қандай қилиб Намба такси хизматига тегишли машинани бошқаргани ҳақида гапирмаган. Мажлисдан кейин уни операцияга киргизиб кетишган.
Суд қарори билан Чингиз икки ойга ҳибсга олинди. Нашр таъкидлашича, ЙТҲда айбдор шахс 8 йилгача қамалиши мумкин.
Аввалроқ Сания Шокирова ҳалокатга учраган автомобиль ҳайдовчиси маст бўлгани хабар берилган эди.
Эслатиб ўтамиз, автоҳалокат 2 июнь куни кечқурун юз берган. Таксомотор компаниясига тегишли Ravon Nexia Чок-Тал қишлоғи яқинида ЙТҲга учраган, машинада уч киши бўлган. Такси ҳайдовчиси бошқарувни эплай олмай қолган, натижада машина қабристон деворига бориб урилган. Шокирова воқеа жойида вафот этган. Қолган йўловчи ва ҳайдовчи касалхонага ётқизилган.
Изоҳ (0)