«Ижтимоий фикр» жамоатчилик фикрини ўрганиш маркази «Фуқаролар Ўзбекистон Республикаси Президенти ҳақида» мавзуcида ижтимоий сўров ўтказди. Бу ҳақда ЎзА хабар бермоқда.
Тадқиқот ўзбекистонликлар Шавкат Мирзиёевнинг Президент лавозимидаги фаолиятини юқори баҳолаётганини кўрсатди. Фуқароларнинг мутлақ кўпчилиги, яъни 91,9 фоизи амалга оширилаётган сиёсий ва ижтимоий-иқтисодий ислоҳотларни, ҳаётнинг барча соҳаларини янада модернизация қилиш, ҳар томонлама ва жадал ривожлантириш, ҳар бир фуқаро ва бутун жамият манфаатларини рўёбга чиқариш борасида кўрилаётган чора-тадбирларни маъқулламоқда ва қўллаб-қувватламоқда.
Ижтимоий сўров натижалари таҳлили фуқароларнинг Президент Шавкат Мирзиёев фаолиятига берган баҳосида ижобий ўсиш кузатилаётганини кўрсатди. Хусусан, бу рақам 2017 йил октябрдаги 89,3 фоиздан 2018 йил майда 91,9 фоизга етди.
«Ўзбекистон Республикаси Президенти Шавкат Мирзиёев томонидан амалга оширилаётган сиёсат сизнинг ишончингиз ва умидларингизни қай даражада оқлади?» деган саволга сўров иштирокчиларининг мутлақ кўпчилиги, яъни 92,5 фоизи «тўлиқ оқлади», деб жавоб берган. Шундай фикрдаги фуқаролар сони 2017 йилдагига нисбатан 2,3 фоизга ортгани аниқланди.
Иштирокчиларнинг аксарияти — 92,2 фоизи «Ўзбекистон Республикаси Президенти Шавкат Мирзиёев томонидан амалга оширилаётган ички сиёсатни қай даражада қўллаб-қувватлайсиз?», деган саволга жавобан тўлиқ қўллаб-қувватлашини билдирди.
Мамлакат аҳолисининг мутлақ кўпчилиги, яъни 92,2 фоизи давлат манфаатларини халқаро майдонда ҳимоя қилиш, хорижий мамлакатлар билан икки ва кўп томонлама ҳамкорликни ривожлантириш, Ўзбекистоннинг жаҳондаги нуфузини юксалтириш борасида амалга оширилаётган чора-тадбирларни, умуман, давлат ташқи сиёсатини тўлиқ қўллаб-қувватлашини қайд этган.
Ижтимоий сўров халқнинг Президентга ишончи юқори эканини кўрсатди. Натижалар таҳлилига кўра, аксарият юртдошлар Ўзбекистон Республикаси Президенти Шавкат Мирзиёев фуқароларнинг ишонч ва орзу-умидларини тўлиқ оқлади, у эл-юрт орасида юксак ҳурмат-эътиборга эга, аҳолининг кўпчилиги томонидан қўллаб-қувватланаётган давлат раҳбари, деган фикрда. Президентга ишонч рейтинги 2017 йил октябрдаги 93,1 фоиздан 2018 йил майда 94,1 фоизга ошгани бунинг ёрқин тасдиғидир.
Изоҳ (0)