Афғонистон ҳудудида GM Uzbekistan автомобиллари йиғилади. Бу ҳақда ЎзА хабар бермоқда.
Мазкур мамлакат ҳудудида ҳозиргача бирорта автомобиль йиғувчи корхона очилмаган. Ўзбекистон эса бу ерда шундай корхона ташкил этиши режаси борлигини билдирди.
Расмийларнинг изоҳ беришича, айни пайтда бу борада музокаралар олиб борилмоқда.
Агар икки давлатнинг айни йўналишдаги ҳамкорлиги самарали ҳал бўлса, Ўзбекистон Афғонистон ҳудудида бундай йирик корхона очган илк давлат бўлади.
Автомобиль йиғувчи корхона мамлакат иқтисодиётига катта ёрдам кўрсатади ва айни вақтда ҳудуддаги энг йирик муаммо бўлган ишсизликнинг камайишига ижобий таъсир кўрсатади. Бу борада икки давлат раҳбарларининг 2017 йил декабрь ойида бўлиб ўтган учрашувида ҳам фикр борган эди.
Мазкур завод Ўзбекистон Афғонистон ҳудудида қуришни кўзлаган ягона корхона эмас. Истиқболда икки давлат ҳамкорлигида пахтани қайта ишловчи қўшма тўқимачилик корхонасини очиш лойиҳаси ҳам турибди.
Ҳозирда Балх вилоятининг бу йўналишдаги муҳандислик-коммуникация имкониятлари ўрганилмоқда ва ўзаро музокаралар олиб борилмоқда.
Изоҳ (0)