«Ўзэлтехсаноат» АК тизимдаги ютуқ ва камчиликлар ҳақида ҳисобот берди

4 июнь куни миллий матбуот марказида «Ўзэлтехсаноат» акциядорлик компанияси томонидан амалга оширилган ишлар, эришилган натижалар, қўлга киритилган ютуқлар ва муаммолар тўғрисида матбуот анжумани ўтказилди.

Тадбирда «Ўзэлтехсаноат» АК ижро аппарати ва унинг таркибига кирувчи корхоналар раҳбарлари ҳамда ОАВ ходимлари иштирок этди.

Унда Ўзбекистонда мустақиллик йилларида электротехника саноатини ривожлантиришнинг истиқболлари ҳақида маълумот берилди.

Қайд этилишича, кенг қамровли ислоҳотлар натижасида компания ва унинг таркибига кирувчи корхоналар томонидан кўпгина муваффақиятларга эришилди. Хусусан, дунёга машҳур компания брендлари ва уларнинг замонавий технологиялари жалб этилмоқда. Бунинг натижасида эса энергия сарфи, экологияга таъсир этувчи чиқиндилар йилдан йилга камайиб бормоқда. Корхоналарда халқаро сифат бошқарув тизими мувофиқлик сертификатлари жорий этилмоқда.

Матбуот анжуманида, шунингдек, 2018—2021 йилларда ҳудудларни иқтисодий-ижтимоий дастурлари доирасида Қорақалпоғистон Республикаси, вилоятлар ва Тошкент шаҳрида амалга оширилаётган бир қатор янги инвестицион лойиҳалар хусусида сўз борди. Ҳудудларда умумий қиймати 731,2 миллиард сўм бўлган 43 та янги лойиҳани амалга ошириш орқали 1 547 та янги иш ўринлари яратиш кўзда тутилган.

Халқаро ҳамкорлик доирасида ҳам жаҳонга машҳур брендлар бўйича турли йўналишлардаги англашув меморандумлари, икки томонлама келишув шартномалари имзоланган. Хусусан, Жанубий Кореянинг «Китурами» компанияси, Хитойнинг Hair Group, Туркиянинг «Одул мадени» компаниялари билан маиший техника ишлаб чиқариш соҳасида қатор лойиҳалар бошлаб юборилган.