SoftBank фонди General Motors робомобилларига 2,25 миллиард доллар сармоя тикади

General Motors корхонаси Cruise ўзини ўзи бошқарувчи автомобиллар ишлаб чиқарувчи бўлинмасига йирик сармоялар жалб қилинганини маълум қилди. Бу ҳақда 3dnews хабар берди.

SoftBank Vision Fund фонди GM’нинг GM Cruise Holdings LLC бўлинмасига 2,25 миллиард АҚШ доллари миқдорида сармоя киритади. GM корхонасининг ўзи қўшимча равишда 1,1 миллаирд АҚШ доллари сарфлашни режалаштирган. GM ва SoftBank Vision Fund томонидан киритиладиган сармоялар натижасида 2019 йили Cruise’нинг бутунлай тижорийлашиши кутилмоқда.

SoftBank Vision Fund томонидан киритиладиган сармоялар 2 та траншда (сармоянинг муайян қисми) амалга оширилади. Биринчи транш 900 миллион АҚШ долларига тенг бўлиб, Cruise робомобилларининг оммавий сотуви йўлга қўйилгандан кейин фонд 1,35 миллиард АҚШ доллари миқдоридаги иккинчи траншни амалга оширади. Киритган сармоялари натижасида SoftBank Vision Fund фонди Cruise’нинг 19,6 фоиз ташкилий капиталини қўлга киритади.