Балиқчи туманидаги «Навниҳол» МФЙ ҳудудида «Обод юрт файзи» паррандачилик фермер хўжалиги фаолияти ЎзА мухбири томонидан ёритилди. Корхона раҳбари Зафариддин Насиббоевнинг айтишича, ҳозир хўжаликда 18 минг дона парранда боқилмоқда.
«Ишни 2015 йили 500 та товуқ билан бошлаган эдик. Жўжаларни бир кунлигидаёқ олиб келамиз. Нархи 4 минг сўм, — дейди тадбиркор. — Асакадаги ‘Парранда ҳамкор’ корхонаси соғлом, ҳаракатчан, тетик ва кафолатли жўжаларни етиштириб бермоқда. Саккиз ишчимиз бор. Саранжом-саришталик, тухумларни тез-тез йиғиб олиш, овқатини бир текисда беради. Уларга 700 минг сўмдан ойлик бераман. Рўзғорига ҳам тухум керак бўлса, олиб ишлатаверади».
«Технологияларимиз замонавий. Кўчада ҳарорат 42 даража бўлса ҳам бу ерда мўътадил иқлим ҳукмрон, — сўзида давом этади у. — Ҳозирча олаётган тухумларимиз тумандаги савдо дўконларидан ортмаяпти. Бизнинг тахминий ҳисоб-китобларимизга кўра, туман эҳтиёжлари учун кунига 50 минг дона тухум керак. Балиқчида яна икки-учта йирик ишлаб чиқарувчилар бор, аммо улар ҳам бу эҳтиёжни тўлиқ қоплай олмайди. Шу сабабли ҳатто Наманган вилоятидан ҳам сотиш учун тухум олиб келишади».
«Ишимизни кенгайтириш учун янги комплекс харид қилдик. Шу ойда яна 30 минг парранда келтирамиз. ‘Саноатқурилишбанк’дан 300 миллион сўм кредит ажратилмоқда. Хитойдан бир ҳафта ичида паррандачилик жиҳозларини 70 минг долларга олиб келаяпмиз. Қўшни давлатлар чегаралар шаффофлашиб, тадбиркорларга жуда яхши бўлди. Яқинда тожикистонлик ҳамкорлар билан музокаралар ўтказдик. Ҳозир бу давлат тухумни жуда катта миқдорда четдан импорт қилмоқда».
Изоҳ (0)