Baliqchi tumanidagi “Navnihol” MFY hududida “Obod yurt fayzi” parrandachilik fermer xo‘jaligi faoliyati O‘zA muxbiri tomonidan yoritildi. Korxona rahbari Zafariddin Nasibboyevning aytishicha, hozir xo‘jalikda 18 ming dona parranda boqilmoqda.
“Ishni 2015-yili 500 ta tovuq bilan boshlagan edik. Jo‘jalarni bir kunligidayoq olib kelamiz. Narxi 4 ming so‘m, — deydi tadbirkor. — Asakadagi ‘Parranda hamkor’ korxonasi sog‘lom, harakatchan, tetik va kafolatli jo‘jalarni yetishtirib bermoqda. Sakkiz ishchimiz bor. Saranjom-sarishtalik, tuxumlarni tez-tez yig‘ib olish, ovqatini bir tekisda beradi. Ularga 700 ming so‘mdan oylik beraman. Ro‘zg‘origa ham tuxum kerak bo‘lsa, olib ishlataveradi”.
“Texnologiyalarimiz zamonaviy. Ko‘chada harorat 42 daraja bo‘lsa ham bu yerda mo‘tadil iqlim hukmron, — so‘zida davom etadi u. — Hozircha olayotgan tuxumlarimiz tumandagi savdo do‘konlaridan ortmayapti. Bizning taxminiy hisob-kitoblarimizga ko‘ra, tuman ehtiyojlari uchun kuniga 50 ming dona tuxum kerak. Baliqchida yana ikki-uchta yirik ishlab chiqaruvchilar bor, ammo ular ham bu ehtiyojni to‘liq qoplay olmaydi. Shu sababli hatto Namangan viloyatidan ham sotish uchun tuxum olib kelishadi”.
“Ishimizni kengaytirish uchun yangi kompleks xarid qildik. Shu oyda yana 30 ming parranda keltiramiz. ‘Sanoatqurilishbank’dan 300 million so‘m kredit ajratilmoqda. Xitoydan bir hafta ichida parrandachilik jihozlarini 70 ming dollarga olib kelayapmiz. Qo‘shni davlatlar chegaralar shaffoflashib, tadbirkorlarga juda yaxshi bo‘ldi. Yaqinda tojikistonlik hamkorlar bilan muzokaralar o‘tkazdik. Hozir bu davlat tuxumni juda katta miqdorda chetdan import qilmoqda”.
Izoh (0)