Ўзбекистон журналистика ва оммавий коммуникация университети вакиллари илғор хорижий тажриба билан танишиш мақсадида Осиё ва Европа мамлакатлари фаолиятини ўргана бошлади. Бу ҳақда университет ректори Шерзодхон Қудратхўжаев Facebook’даги саҳифасида маълум қилди.
Хусусан, Санкт-Петербург университети қошидаги Журналистика ва оммавий коммуникациялар институти ҳамда Ломoносов номидаги Москва давлат университети журналистика факультети фаолияти ўрганилди.
«Бу икки олий ўқув даргоҳи Россия Федерациясида журналист кадрларни тайёрлаш бўйича энг йирик ташкилотлар ҳисобланади. Санкт-Петербург университетида Ўзбекистон вакилларини университетнинг халқаро фаолият бўйича проректор С.Андрюшин ва мазкур институт директори, профессор А.Пую қабул қилиб, институт фаолияти ҳақида гапириб берди. Бу ерда талабаларниннг амалиёти яхши ташкил қилинган экан ва амалиёт бўйича ҳисоботларни ҳамда битирув малакавий ишлар ҳимоясини асосан амалиётда ишлайдиган журналистлар қабул қилар, факультет профессор-ўқитувчилари бу жараёнга аралашмаскан. Жами талабалар сони бир ярим минг нафардан кўп кишини ташкил этади.
Москва давлат университети журналистика факультети уч ярим минг нафар талабага эга бўлиб, улар кундузги, кечки ва бошқа дастурлар бўйича таҳсил олади. Факультет Европада энг йирик олий ўқув юртларидан бири ҳисобланади. Факультет декани профессор Е.Вартанова меҳмонларни факультет мультимедиавий воситалар маркази ҳамда кутубхонаси билан таништирди. Бу ерда теле- ва радиомарказлар мавжуд бўлиб, талабалар видео ва аудио материалларни тайёрлашнинг барча босқичларини ўзлари бажаради. Уларнинг ижоди маҳсули Youtube канали ва факультет веб-сайтига жойлаштирилади. MДУ журналистика факультети ўқитувчилари катта миқдорда ўқув ва илмий адабиётларни тайёрлашга қодир ва ўқув жараёнини ушбу ўқув қўлланмалар билан тўлиқ ўзлари таъминлашади», — дея ҳикоя қилади Ш. Қудратхўжаев.
Ўзбекистон журналистика ва оммавий коммуникация университети ректори Шерзод Қудратхўжаев ва MДУ журналистика факультети декани Елена Вартанова ўзаро ҳамкорлик ҳақида меморандумни имзолади. Яқин кунларда бошқа давлатлар, жумладан Жанубий Корея, Туркия ва Германия тажрибасини ўрганиш ҳамда улар билан ҳам меморандумлар тузиш кўзда тутилмоқда.
Изоҳ (0)