«Ўзавтосаноат» мамлакатда GM Uzbekistan енгил автомобилларини сотиш тизимини тўлиқ қайта ташкил этишни режалаштирмоқда. Бу ҳақда 31 май куни бўлиб ўтган матбуот анжуманида компания бошқарув раиси Умиджон Салимов маълум қилди, деб ёзади «Газета.uz».
«Мақсад қуйидагича: мижоз келади, машина учун пул тўлайди ва уни шу заҳоти олиб кетади — биз биринчи навбатда мана шуни таъминлашимиз керак. Чунки, агар одам пулининг 85 фоизини тўласа, бу машина уники, заводники эмас. Бизнинг вазифамиз — мижозни харид чоғида автомобиль билан таъминлаш. Бизнинг ҳисоб-китобларимиз бўйича бунинг учун йилига 220—230 мингтадан ортиқ ҳажмда автомобиль ишлаб чиқариш керак», — деди у.
Дилерларда, бош заводдаги омборларда ва омбор захираларида автомобилларнинг бўлиши — буларнинг барчаси ишлаб чиқаришнинг умумий ҳажмига боғлиқ. Ўтган йили GM Uzbekistan 140 247 та автомобиль ишлаб чиқарган, бу 2016 йилдагидан 59 фоизга кўпроқ. Экспортга 26,8 мингта автомобиль юборилган. «Биз ҳажмни кўпайтирамиз», — деди Умиджон Салимов.
«Ўзавтосаноат» раҳбари автомобиллар савдоси тизимида дилерлар фаолияти чет эл тажрибаси асосида қайта кўриб чиқилишини айтди. «Ўзавтосаноат» Германия, Жанубий Корея, Япония, АҚШ ва бошқа ривожланган мамлакатлар савдо тизимини мўлжаллаб иш тутмоқда.
Изоҳ (0)