«Ўзавтосаноат» компанияси ҳозирги вақтда GM Uzbekistan’нинг 90 фоиз акциясига эгалик қилмоқда, яқин бир йил ичида Тошкентдаги мотор заводи акцияларини сотиб олиш бошланади. Бу ҳақда «Ўзавтосаноат» бошқаруви раиси Умиджон Салимов 31 май, пайшанба куни бўлиб ўтган матбуот анжуманида маълум қилди.
«GM Uzbekistan’нинг бош заводи акцияларини ҳукумат қарори билан сотиб оляпмиз. Ҳозирги вақтда сотиб олинмаган фақат 10 фоиз акция қолган, у ҳам белгиланган жадвал асосида йил охиригача сотиб олинади. Йил охирида эса завод номини ўзгартиришни режалаштиряпмиз. Янги бир ном берилади», — деди «Ўзавтосаноат» раҳбари.
Қайд этишларича, Асакадаги завод қувватларидан фойдаланиш бўйича ҳозирги вақтда Европадаги ишлаб чиқарувчилар (улар орасида Volkswagen ҳам бор), Хитойдаги ишлаб чиқарувчилар, шунингдек, Жанубий Кореядаги автомобиль ишлаб чиқарувчилар билан музокаралар олиб борилмоқда.
Мавзуга доир: «Ўзавтосаноат» электромобиллар устида иш олиб боряпти. Бир ой ичида синов учун икки электрокар Тошкентга келтирилади
«Бу корхонада General Motors’нинг улуши 70 фоиздан ортиқ. Ушбу завод бўйича музокараларда муҳокама қилиниши керак бўлган бир-икки масала қолган. Шулардан бири — завод қувватларидан General Motors’никидан бошқа муқобил моторларни ишлаб чиқаришда ҳам фойдаланиш. Уч ой ичида музокаралар якунланиши, шундан сўнг завод акцияларини сотиб олишга киришиш кутилмоқда», — деди Салимов.
Изоҳ (0)