Афғонистоннинг Лоғар вилоятида толибонлар томонидан Гул Наби исмли оқсоқол ўлдирилди. У АҚШ президенти Дональд Трампга «жасурлик» учун олтин медаль тайёрлаганидан сўнг машҳур бўлиб кетган эди. Бу ҳақда EADaily хабар берди.
Трампни жасурлик учун тақдирлаш ҳақида Наби ўзининг ўртоғи маҳаллий полиция қўмондони Фарҳод Акбарий билан ўйлаган. Тақдирлаш ҳақидаги фикрнинг юзага келишига АҚШ томонидан қўшни Покистонга ҳарбий ёрдамнинг тўхтатилгани сабаб бўлган.
Жорий йилнинг январь ойида фаоллар олтиндан қўлбола медаль тайёрлаш учун маблағ йиғишни бошлаган. Лоғар вилоятининг тахминан 300 нафар аҳолиси ўз ҳиссасини қўшган. Медальнинг умумий қиймати 645 долларни ташкил қилган. Гул Набининг шахсан ўзи медалга ёзув қолдирган. Унда Трампга афғон халқи номидан миннатдорлик билдирилган. Якунда оқсоқол ва қўмондон Кобулдаги АҚШ элчихонасига медални топширган.
Оқсоқолнинг ҳаракатлари толибларни бефарқ қолдирмади. Улар Набининг автомобилига портловчи қурилмани ўрнатган ва оқсоқол портлаш оқибатида қурбон бўлган. «Толибон» воқеа учун жавобгарликни ўз бўйнига олган.
Изоҳ (0)