Бугун,

  • USD 11014.01
  • RUB 191.8
  • EUR 10674.78

Инновацион ривожланиш вазирлигида АҚШ Халқаро ривожланиш агентлигининг (USAID) Ўзбекистондаги ваколатхонаси раҳбари Гарри Роббинс билан учрашув бўлиб ўтди. Бу ҳақда «Дарё»га вазирлик матбуот хизмати хабар бермоқда.

Фото: Инновацион ривожланиш вазирлиги матбуот хизмати

Фото: Инновацион ривожланиш вазирлиги матбуот хизмати

Жаноб Роббинс суҳбатни сўнгги йилларда Ўзбекистонда бўлаётган ижобий ўзгаришларнинг шиддатини эътироф этишдан бошлаб, «бу ўзгаришларни кузатарканмиз, қандай қилиб шунча ислоҳотларга улгираётганингиздан ҳайратдамиз» дея лутф қилди. Шавкат Мирзиёевнинг икки ҳафта бурун АҚШга расмий ташрифини икки давлат ўзаро муносабатларидаги тарихий воқеа эканини айтди. Президентнинг АҚШ Конгресси, Мудофаа вазирлиги ва Давлат департаменти ҳамда Жаҳон банкида ўтказган икки томонлама учрашувларига юқори баҳо берди.

Инновация вазири Иброҳим Абдураҳмонов олим ва илмий-тадқиқот институтининг раҳбари сифатида USAID билан ҳамкорлик тажрибасига эга экани, ўзи ҳам АҚШ университетларидан бирида таълим олганини айтиб, Ўзбекистонда АҚШнинг аграр университетларидан бирини очиш масаласини ижобий ҳал этиш бугунги кун талаби эканини таъкидлади. Шунингдек, қишлоқ хўжалигига замонавий ўғитлаш технологиялари, геномикага доир янгиликлар, GPS ускуналари, компьютер орқали бошқариладиган тизимларни олиб кириш масалалари муҳокама қилинди.

Вазир Ўзбекистонда пахта уруғчилигида эришилган ютуқлар ҳақида гапираркан, мамлакатда янги инновацион технология асосида яратилган янги ғўзанинг пахта толаси сифати жиҳатдан жаҳонда етакчи эканини, бу навлардан етиштирилган пахтанинг толаси узун ва ингичкалиги билан ажратиб туриши, дунёнинг қатор мамлакатлари, жумладан, АҚШда ҳам бу технологияга қизиқиш жуда катта бўлаётганини айтди. Ўзбекистон олимлари, ихтирочиларининг илғор ғоялари, яратган технологияларини чет даавлатларгаа экспорт қилиш зарурлигини таъкидлади.

Музокараларнинг кейинги қисми иқтисодий соҳа борасида бўлди. АҚШда таълим олиб, қарийб 20 йил давомида АҚШ, Буюк Британия, Россия давлатларида молия соҳасида юқори лавозимларни эгаллаб келган Инновация вазирининг ўринбосари Отабек Назиров банк тизимини тубдан ўзгартирмай туриб мамлакат иқтисодини юқорига кўтариш мумкин эмаслиги, банк соҳасини ривожлантириш учун эса ҳориждан синалган тажрибаларни Ўзбекистонда татбиқ этиш мақсадга мувофиқ эканини таъкидлади. У АҚШнинг нуфузли банкларини Ўзбекистонда филиалларини очиш масаласида жаноб Роббинсга мурожаат қилиб, бу масалани тез суръатларда ҳал қилиниши учун томонлар биргаликда қадамлар ташлашлари лозимлигини айтди.

Гарри Роббинс ўз навбатида солиқ соҳасида рўй бериши кутилаётган ислоҳотлар Ўзбекистон иқтисодиётининг барқарор ўсишига туртки бўлиши, 15 йил давомида иқтисодий кўрсаткичларнинг пастга тушишидан кейин охирги икки-уч йилда юқорига ўсиш бўлаётганидан хурсандлигини айтиб, USAID Ўзбекистон билан ҳамкорликка шай эканига алоҳида урғу берди.

Сўнг томонлар атроф-муҳит муҳофазаси соҳасига тўхталди. Ўзбекистон Орол бўйи мамлакатларидан бири бўлгани учун унинг экологик аҳволи оғир экани, қурғоқ ерларни ободлаштириш, қуриб қолган ўзанларни тўлдириш каби муаммоларни ҳал қилиш учун шу соҳадаги дунёнинг энг зўр мутахассисларини жалб қилиш зарурияти ҳақида гапирилди. Қурғоқ ерларда иш тажрибасига эга бўлган муҳандисларни Ўзбекистонга таклиф қилиш, махсус ўқув машғулотлари ўтказиш имкониятлари муҳокама қилинди.

Фото: Инновацион ривожланиш вазирлиги матбуот хизмати

Фото: Инновацион ривожланиш вазирлиги матбуот хизмати

Учрашув сўнгида вазир меҳмонга мамлакатда етиштирилган пахта толасидан Ўзбекистонда ишлаб чиқарилган юқори сифатли маҳсулот — оппоқ футболка ҳадя қилди. Томонлар ўзаро ҳамкорликка умидлари катта эканини яна бир бор таъкидлаб, кейинги музокараларгача хайрлашди.

Изоҳ
Асосий янгиликлар