23 май, чоршанба куни Ташқи савдо вазирлигида Европа Иттифоқининг Шарқий Европа ва Марказий Осиё бўйича Кенгаши ишчи гуруҳи делегацияси билан музокаралар ўтказилди. Бу ҳақда Ташқи савдо вазирлиги матбуот хизмати «Дарё»га хабар берди.
Музокаралар давомида Ўзбекистон ва Европа Иттифоқи ўртасида савдо-иқтисодий алоқаларни кенгайтириш масаласи муҳокама қилинди.
Европа Иттифоқи Ўзбекистоннинг савдо-иқтисодий соҳадаги асосий ҳамкорларидан биридир. 2017 йили Европа Иттифоқига аъзо мамлакатлар билан товар айирбошлаш ҳажми 2,5 миллиард АҚШ долларини ташкил қилди. Жумладан, 420,7 миллион АҚШ доллари экспорт ҳиссасига тўғри келади.
«Европа Иттифоқи билан савдо алоқаларини яхшилашнинг йўлларидан бири — Плюс преференцияларнинг (имтиёзлар) асосий дастури (ГСП+) доирасида Ўзбекистонга бир тарафлама имтиёзлар тақдим қилиниши. Ҳозирда Ўзбекистон нисбатан Преференцияларнинг асосий дастуридан (ГСП) фойдаланмоқда. Унга кўра, Ўзбекистон Европа Иттифоқига божхона тўловларисиз 3000 та товар позицияларини ва камайтирилган ставкалар асосида 3200 та товар позицияларини юбориши мумкин. Агар ГСП+ дастури бўйича имтиёзлар тақдим қилинса, Ўзбекистон 6200 та товар позицияларини божсиз айирбошлаш имконини қўлга киритади», — деди Ташқи савдо вазири Жамшид Хўжаев.
Шунингдек, вазир Европа Иттифоқи мамлакатлари томонидан текстил маҳсулотларининг икки тарафлама савдоси тўғрисидаги келишувга амалга қилиниши Ўзбекистон учун муҳим эканини таъкидлади. Бироқ Европа Иттифоқи билан ҳамкорлик тўғрисидаги келишувга ўзгартиришлар киритиш ҳақидаги протоколнинг имзоланганига бир йил бўлганига қарамасдан, ЕИ мамлакатлари Ўзбекистон томонидан текстил маҳсулотларининг етказиб берилишида қийинчиликлар яратмоқда. Музокаралар давомида ЕИ вакиллари божхона хизматлари ва аъзо мамлакатларнинг ҳукуматларига текстил тўғрисидаги протоколнинг шартларини тушунтириш масаласини кўриб чиқишга ваъда берди.
Шунингдек, Жамшид Хўжаев логистика тизимининг муҳимлигини таъкидлади. Алоқаларни яхшилаш учун вазир ТRASEKA транспорт корридорини ривожлантириш ва технологик камчиликларни тугатишни таклиф қилди.
«Ўзбекистон-ЕИ» ҳамкорлик қўмитаси ва унинг қошидаги иқтисодиёт, савдо ва инвестициялар қўмитасининг 6—8 июнь кунлари Брюсселда бўлиб ўтадиган навбатдаги йиғилишига тайёргарлик бошланган. Унда икки тарафлама ва минтақавий ҳамкорлик масалаларини муҳокама қилиш режалаштирилган.
Изоҳ (0)