Ўзбекистонда ягона мактаб формаси июль ойидан сотила бошлайди

23 май куни Халқаро пресс клубнинг «Мактаб формаси: замонавий бичим, инновацион ёндашув ва умумий танлов» мавзусида навбатдаги сессияси бўлиб ўтди.

Сессияда қайд этилишича, жорий йил март май ойларида 10 хилдаги намунавий мактаб формалари тажриба-синовдан ўтказилди.

Мактаб формаси 3 ёш гуруҳига бўлинган ҳолда танланиши кўзда тутилмоқда. 1—4, 5—8 ва 9—11 синф ўқувчилари учун алоҳида-алоҳида формалар яратилган.

Бугунги кунда тажриба-синов натижалари бўйича ота-оналар, ўқувчи ва ўқитувчиларнинг фикрлари жамланиб, таҳлил қилинмоқда.

Уларнинг фикрлари асосида танлаб олинадиган дизайндаги мактаб формаларини 2018—2019-ўқув йилидан барча умумтаълим мактабларига жорий қилиш бўйича Вазирлар Маҳкамасининг тегишли қарори қабул қилинади.

Мазкур қарор лойиҳасида қуйидагилар назарда тутилади:

• «Ўзтўқимачиликсаноат» уюшмаси томонидан мактаб формаларини тайёрлаш учун ҳудудлардаги тегишли қувватга эга ишлаб чиқарувчиларни белгилаш ва тасдиқланган намунавий шакллардаги мактаб формаларини нархларнинг ижтимоий ҳаммабоплигини таъминлашга алоҳида эътибор қаратган ҳолда ишлаб чиқарилишини ташкил этиш;
• Қорақалпоғистон Республикаси Вазирлар Кенгаши, Тошкент шаҳар ва вилоятлар ҳокимликлари «Ўзтўқимачиликсаноат» уюшмаси билан ҳамкорликда 2018 йил июль ойидан бошлаб мактаб формалари савдосини ташкил қилиш бўйича республиканинг барча туман (шаҳар) марказларида аҳолига қулай жойларда мактаб формаларини ишлаб чиқарувчи корхоналарнинг ихтисослаштирилган савдо шохобчаларини ташкил қилиши;
• Ўзбекистон Республикаси стандартлаштириш, метрология ва сертификатлаштириш агентлиги Соғлиқни сақлаш вазирлиги билан биргаликда ишлаб чиқарилаётган мактаб формаларининг белгиланган стандартларга, санитария қоидалари нормалари ва гигиена нормативларига мувофиқлиги устидан қатъий назорат ўрнатиши;
• Ўзбекистон Республикаси Марказий банки тижорат банклари билан биргаликда мактаб формаларини харид қилиш учун аҳолига Марказий банкнинг қайта молиялаштириш ставкасидан ошмайдиган фоиз ставкаси бўйича қисқа муддатли микрокредитлар ажратилишини таъминлаши;

• 2018—2019-ўқув йилидан бошлаб барча давлат умумий ўрта таълим муассасаларида ўқувчилар учун намунавий мактаб формалари шакллари доирасида ягона мактаб формасининг жорий қилинишини таъминлаш;
• аҳоли ўртасида ўқувчиларнинг умумий ўрта таълим муассасаларига белгиланган мактаб формасида келишининг афзалликлари тўғрисида тушунтириш ишларини олиб бориш;