Тошкентда Амир Темур хиёбонидан Зарафшон кўчасигача ҳамда Шароф Рашидов проспектидан Матбуотчилар кўчаси бўйлаб транспорт ҳаракати қайта йўлга қўйилди (видео)

Тошкентнинг Амир Темур хиёбонидан Зарафшон кўчасигача, шунингдек, Шароф Рашидов проспектидан Матбуотчилар кўчаси бўйлаб транспорт ҳаракати қайта йўлга қўйиладиган бўлди. Бу ҳақда «O’zbekiston 24» хабар берди.

«Бундан 10—15 йил илгари шаҳарнинг марказидаги айрим кўчалар ёпилган, бу мутасадди ташкилотлар томонидан хавфсизлик нуқтаи назаридан дея изоҳланган эди. Бу эса ҳайдовчилар учун ҳам, йўловчилар учун ҳам ноқулайликларни келтириб чиқарган эди», — дейилади репортажда.

Эндиликда Амир Темур хиёбонидан Зарафшон кўчасигача, шунингдек, Шароф Рашидов проспектидан Матбуотчилар кўчаси бўйлаб Амир Темур хиёбони айланма йўлигача транспорт ҳаракати учун йўл очилди.

Тошкент шаҳар ҳокимлиги матбуот хизмати раҳбари Ҳусниддин Эргашевнинг сўзларига кўра, Тошкент шаҳри аҳолисидан келиб тушган кўплаб мурожаатлар ва таклифлар ўрганиб чиқилгач, ушбу иккита марказий кўчани қайта очишга қарор қилинган.

Ушбу йўллардан 22 майдан бошлаб бемалол фойдаланиш мумкин бўлади.