Ўзбекистон Россияни бутун дунёда обрўга эга мамлакат деб билади ва у билан барча йўналишларда алоқаларни ривожлантириш ниятида. Бу ҳақда Ўзбекистон Мудофаа вазири Абдусалом Азизов россиялик ҳамкасби Сергей Шойгу билан музокараларда айтиб ўтди, деб ёзади «ТАСС».
«Биз Россияни бутун дунёда ва минтақада обрўга эга мамлакат деб биламиз. Бизнинг тарихий алоқаларимиз, маданий, иқтисодий алоқаларимиз — буларнинг барчасини ташлаб қўйиб бўлмайди. Икки мамлакатни боғлаб турган ришталарни, ўйлайманки, сиз билан бундан кейин ҳам ривожлантирамиз», — деди Абдусалом Азизов.
У икки мамлакат ўртасида кадрлар тайёрлаш, бўлинмаларнинг ҳарбий-техник таъминоти ва ҳарбий тайёргарлиги соҳасидаги ҳамкорликни қайд этди.
«Россиялик мутахассислар жуда кўп ёрдам бермоқда ва, табиийки, Ўзбекистон делегацияси ва жамоалари ‘АрМИ’да ва ‘Армия’ форумида қатнашмоқда. Ижобий натижалар ҳам кузатилмоқда», — деди Ўзбекистон мудофаа вазири.
Изоҳ (0)