Японияда давом этаётган «Ўзбекистон ҳафталиги» доирасида маданият вазири ўринбосари К. Оқилованинг Токио шаҳрида Япония «Мин-Он» концерт ассоциацияси президенти К. Ито билан учрашди. Бу ҳақда ЎзА хабар бермоқда.
Япониянинг ушбу уюшмаси турли мамлакатлар билан маданият, мусиқа соҳасида ҳамкорлик алоқаларини ўрнатиш билан шуғулланади.
К. Ито К. Оқилова ҳамроҳлигида Ўзбекистон амалий санъати ва миллий ҳунармандчилик кўргазмасини кўздан кечирди. У Ўзбекистон билан Япония ўртасида қарор топган дўстлик ва яқин ҳамкорлик алоқалари маданий-гуманитар соҳада ҳам фаол ривожланаётганини таъкидлади.
Японияда ташкил этиладиган турли тадбирларда Ўзбекистон санъат усталари, Самарқандда ўтказиладиган «Шарқ тароналари» халқаро мусиқа фестивалида эса япониялик вакилларнинг иштирок этиши ўзига хос анъана тусини олганини мамнуният билан қайд этди.
Ҳафталик доирасида Ўзбекистон вакиллари Япония парламенти депутатлари, маданият ва санъат намояндалари билан учрашувлар ўтказмоқда. Музейлар ишини ташкил этишда замонавий технологиялардан кенг фойдаланиш, музейга келувчилар учун қулайликлар яратиш соҳасида ҳамкорликни мустаҳкамлаш имконини берадиган келишувларга эришилди.
Изоҳ (0)