Нукус шаҳридаги «Нукус деҳқон бозори» АЖ савдо мажмуасида Ҳисоб палатаси, Қорақалпоғистон Мажбурий ижро бюроси ва Қорақалпоғистон солиқ инспекцияси ҳамкорлигида давлат даромадларига ўтказиладиган товарлар савдо ярмаркаси ташкил этилди. Бу ҳақда ЎзА хабар берди.
Савдо ярмаркаси жиноят ишлари бўйича судларнинг ижро ҳужжатларига асосан ташкил қилинган.
Муваққат тарзда ўтказилаётган 2 кунлик ярмаркада қиймати 400 миллион сўмдан ошадиган товарлар сотувга чиқарилган. Шу жумладан, арзонлаштирилган нархдаги юздан ортиқ кийим-кечак, пойабзал, газлама, сочиқ, парфюмерия маҳсулотлари, уяли телефон аппаратлари ва уларнинг эҳтиёт қисмлари каби маҳсулотлар сотилади.
Ярмаркада МИБ томонидан онлайн аукцион ўтказилади.
Савдо ярмаркасида сотилмай қолган ёки жиноят ишлари бўйича судларнинг ижро ҳужжатларига асосан давлат даромадларига ўтказилиши белгиланган бошқа маҳсулотлар Нукус шаҳридаги махсус шоҳобчаларда сотилади.