Тожикистонга кирадиган Ўзбекистон автотранспорти учун мажбурий суғурта жорий этилди

4 май куни Тожикистон ҳукумати томонидан қабул қилинган қарорга кўра, 12 майдан бошлаб Ўзбекистон автотранспорт воситалари, бошқа ўзи юрар машиналари ва механизмларининг Тожикистон божхона ҳудудига киришига суғурта полиси мавжуд бўлган тақдирдагина рухсат берилади. Бу ҳақда Asia-Plus «Тожиксуғурта» ДУК кадрлар ва ахборот бўлими бошлиғи Аломудин Алиевга таяниб хабар берди.

Унинг сўзларига кўра, енгил автомобиллар ҳайдовчилари учун суғурта бадали 461,25 сомони (52 доллар)ни ташкил қилади. Ўзбекистоннинг юк машиналари учун суғурта йиғимлари 768,75 (85 доллар) сомони, автобуслар учун — 615 сомони (68 доллар), микроавтобуслар учун — 553,50 сомони (61 доллар), трактор, комбайн ва бошқа ўзи юрар машина ва механизмлар учун — 307,50 сомони (34 доллар), мототранспорт учун — 215,25 сомони (23 доллар) миқдорида белгиланди.

Суғурта полисининг амал қилиш муддати — бир ой.

«Тожиксуғурта» вакили Тожикистон томонидан белгиланган ставкалар аввалроқ Ўзбекистон томонидан Тожикистон автотранспорт воситаларининг Ўзбекистон ҳудудига кириши учун белгиланган ставкалар билан деярли бир хил миқдорда эканлигини қайд этди.