Челябинск вилояти делегацияси Ўзбекистонга металлургия ва машинасозлик маҳсулотлари экспортини муҳокама қилиш учун ташриф буюради, деб хабар берди Spot.
15—19 май кунлари Ўзбекистонда Челябинск вилояти кунлари бўлиб ўтади. Челябинск губернатори Борис Дубровский ва вилоятдаги 35 та корхона вакиллари потенциал ҳамкорлар билан металлургия маҳсулотларини экспорт қилиш, шунингдек, автомобилсозлик ва қишлоқ хўжалиги соҳасидаги ҳамкорлик масалаларини муҳокама қилади.
Ташрифдан мақсад—Ўзбекистон билан Челябинск вилояти ўртасидаги ҳамкорлик имкониятларини кенгайтириш, қўшма лойиҳаларни ишлаб чиқиш.
Делегация Самарқанд вилояти, Тошкент ва Наманганга ташриф буюради.
Челябинск вилоятидан металлургия ва машинасозлик маҳсулотларини Ўзбекистондаги машинасозлик корхоналари эҳтиёжлари учун экспорт қилиш имкониятлари, автомобилсозлик соҳасида қўшма лойиҳаларни амалга ошириш, кимё саноати, қишлоқ хўжалиги, енгил саноат ва бошқа кўплаб соҳалардаги ҳамкорликни муҳокама қилиш режалаштирилмоқда.
17 май куни Тошкентда очиладиган бизнес-форум доирасида Челябинск вилояти ва Жанубий Урал Савдо-саноат палатаси тақдимотлари ўтказилади. Шунингдек, Ўзбекистонда Жанубий Урал савдо уйининг очилиши ҳам бўлиб ўтади.
Изоҳ (0)