«Менинг фикрим» порталида турли муҳр ва штамплар босилган хориж валюталарини банк комиссиясисиз қабул қилиш бўйича петиция рўйхатдан ўтказилди, деб хабар беради Sputnik.

Петиция муаллифининг таъкидлашича, кўплаб хорижликлар, хусусан, Осиё давлатларидан бўлган сайёҳлар валюта айирбошлаш шохобчаларида нима сабабдан степлер билан тешилган, муҳр ва штамп туширилган валюталар қабул қилинмаётганидан ҳайратда.

«Улар Ташқи иқтисодий фаолият миллий банкига кейинчалик 5 фоиздан 20 фоизгача комиссия суммаларини олиб қолган ҳолда алмаштириш учун юборилади. Бизнинг банк тизимимиз Покистон, Ҳиндистон, Хитой, Афғонистон, Малайзия, Индонезия ва бошқа мамлакатларда ушбу штамп ва муҳрлар купюранинг ҳақиқийлигини билдиришини англаши керак. Ушбу мамлакатлардан бўлган деярли барча туристлар бу каби ноқулайликка дуч келмоқда», — дейди петиция муаллифи.

«Аслини олганда вазият унданда ёмон. Ўзбекистон аҳолиси кўп йиллардан буён валютани фақатгина ‘қора бозор’дан харид қилиб келган. Альбатта, бундай вазиятда кўпчилик купюраларнинг сақланишига эътибор бермаган, долларнинг аксарияти тенг иккига букланган ҳолда йиллаб сақланган. Шу билан бирга у вақтда танлов бўлмаган, нимани таклиф қилишса, ўшани сотиб олишга мажбур бўлишган», — дейилади хабарда.

Валюта бозорининг либераллашувидан кейин кўплаб ўзбекистонликлар ўз долларлари «ёмон сақлангани» учун банкларга топшира олмай азият чекмоқда. Айни вақтда ушбу вазиятнинг ягона чораси — эски купюра учун банк комиссиясини тўлаш.

Қизиқ жиҳати, банклараро амалга оширилган пул ўтказмаларида фуқароларга эски купюраларнинг ҳам топширилиши кузатилган.