Ўзбекистон Республикаси Адлия собиқ вазири Равшан Муҳиддинов қамоқдан озод этилди. Равшан Муҳиддинов пора олганлик, хизмат ваколатларини суиистеъмол қилганлик ва бошқа айбловлар билан 2011 йили қўлга олиниб, 2012 йили суд қарорига кўра 15 йилга озодликдан маҳрум этилган эди, деб хабар беради «Xabar.uz».
Жиноят ишлари бўйича Тошкент шаҳар судининг яқинда бўлиб ўтган суд мажлисида собиқ амалдор реабилитация қилиниб, афв этилган.
Равшан Муҳиддинов 1963 йилнинг 22 июлида Тошкент шаҳрида туғилган. Маълумоти — олий, 1985 йили ТошДУнинг ҳуқуқшунослик факультетини, 1997 йили Ўзбекистон Президенти ҳузуридаги Давлат ва жамият бошқаруви академиясини тамомлаган.
У Чилонзор тумани прокуратураси стажёри (1985—1986 йиллар), Тошкент шаҳар прокуратураси терговчиси (1986—1992 йиллар), тергов бўлими прокурори, катта прокурори, Бош прокуратуранинг ташкилий назорат ва таҳлий бошқармаси прокурори (1992—1995 йиллар), Бош прокуратуранинг тергов бошқармаси бошлиғи ўринбосари, Президент девонида масъул ходим (1997—1998 йиллар), Жиззах вилояти прокурори (2000—2005 йиллар), Президент девонида масъул ходим (2005—2006 йиллар), Бош прокурор ўринбосари, Бош прокуратура ҳуҳуридаги СВОЖЖДЛҚК департаменти директори (2006—2007 йиллар), Адлия вазири (2007—2011 йиллар) лавозимларида ишлаган.
У 2011 йилнинг июнида у Муиджон Тоҳирийнинг ўрнига Ўзбекистон Президентининг ҳуқуқни муҳофаза қилувчи ва назорат органлари фаолиятини мувофиқлаштириш бўйича давлат маслаҳатчиси этиб тайинланганди. Бироқ у ушбу вазифада бир йил ҳам ишламай 2011 йилнинг 21 сентябрида Президент фармонига мувофиқ ишдан олиниб, Тошкент вилояти прокурори вазифасини вақтинча бажарувчи этиб тайинланган эди. У 2011 йилнинг 20 ноябрида ҳибсга олинган ва 2012 йилнинг февралида суд қарорига мувофиқ қамоқ жазосига ҳукм қилинган эди.
Равшан Муҳиддинов Ўзбекистонда хусусий нотариусларнинг ёпилишига олиб келган «Нотариат тўғрисида» қонуннинг ташаббускори ҳисобланади.
Изоҳ (0)