8 май санасида Осиё велоспорт конфедерацияси президенти Осама Аҳмад Абдулла ал-Шафар Ўзбекистонга келган эди. Бугун, 11 май конфедерация президенти ал-Шафар билан Миллий олимпия қўмитасида учрашув бўлиб ўтди. Бу ҳақда МОҚ ахборот хизмати хабар берди.
Учрашувда томонлар 2019 йилда велоспортнинг шоссе йўналиши бўйича Ўзбекистонда бўлиб ўтадиган Осиё чемпионатига тайёргарлик масалаларини муҳокама қилди.
Ўз навбатида ал-Шафар Осиё велоспорт конфедерацияси 2019 йилги мусобақани ташкил этишда Ўзбекистонга ёрдам беришга тайёр эканлигини маълум қилди. Шунингдек, томонлар ўзбек велоспортида янги инновацион технологияларни қўллаш, жумладан фотофинишларни жорий этишда ҳамкорлик қилишга келишиб олди.
МОҚ раҳбари Умид Аҳмаджоновнинг сўзларига кўра, жорий йилнинг ўзида Ўзбекистонда велоспорт бўйича 300 та мусобақа ўтказилади.
Учрашув якунида Миллий олимпия қўмитаси номидан меҳмонларга эсдалик совғаларини тақдим этилди.
Бугуннинг ўзида Тошкентдаги International hotel меҳмонхонасида Осиё велоспорт конфедерациясининг ижроқўм йиғилиши бўлиб ўтади. Осама Аҳмад Абдулла ал-Шафарнинг ташрифи давомида Ўзбекистон велосипед спорти федерацияси раиси Танзила Нарбаева билан ҳам учрашиши кўзда тутилган.
Изоҳ (0)