«Ҳокимнинг бир куни» тадбири доирасида Тошкент шаҳридаги барча туман ҳокимларига ОАВ мухбирлари кун бўйи ҳамроҳлик қилмоқда. «Дарё» мухбирининг «чекига» Чилонзор тумани ҳокими Даврон Ҳидоятов тушди.
Даврон Ҳидоятов (1976 йилда туғилган) — Тошкент давлат иқтисодиёт университети (1998 йил) ва Ўзбекистон банк-молия академияси (2001) битирувчиси. 1996—2004 йилларда Ўзбекистон Марказий банки тизимида, 2004—2005 йилларда Осиё-Инвест Банк (Москва) бошқаруви раиси лавозимида ишлаган.
2009 йилдан 2012 йилгача GM Uzbekistan компаниясининг молия бўйича ижрочи директори, 2012 йилдан 2014 йилгача MAN Auto-Uzbekistan ҚК бош директори лавозимларида хизмат қилган.
Даврон Ҳидоятов 2014—2017 йиллар оралиғида Ўзбекистон Хусусийлаштириш, монополиядан чиқариш ва рақобатни кучайтириш Давлат қўмитаси раиси бўлиб ишлаган. 2017 йил 18 апрелида Чилонзор тумани ҳокими лавозимига тайинланган.
9 май — Хотира ва қадрлаш куни муносабати билан Тошкент шаҳрида ободонлаштириш ишлари айни авжига чиққан. Хусусан, Чилонзор тумани ҳокими зиммасига «Халқлар дўстлиги» саройи ва унинг атрофидаги майдонни қайтадан барча талабларга жавоб берувчи замонавий кўринишда бунёд этиш топширилган.
Майдонга соат 07:00 да етиб борган бўлсак, 400 га яқин одам тозалаш ишларини олиб бораётганига гувоҳ бўлдик. Уларга Чилонзор туман ҳокими Даврон Ҳидоятовнинг ўзи бошчилик қилаётган экан. Эртага байрам арафаси фойдаланишга топширилиши кутилаётган «Халқлар дўстлиги» майдонида қурилиш ишлари якунланган, фақатгина супуриш ва артиш каби «пардоз» ишлари қолганди.
Туман ҳокимлиги ўзининг Facebook’даги саҳифаси орқали туманнинг барча ёшларини мазкур ободонлаштириш ишларида кўнгилли сифатида иштирок этиш борасида пост қолдирган эди. Шу сабабли соат 09:00 дан сўнг юзлаб ёшлар ўз хоҳиши билан меҳнат қилаётган идора вакиллари ёрдам кўрсатишга етиб келишди. Уларнинг ҳар бирига «Чилонзор ёшлари» белгиси туширилган футболкалар тарқатилди.
Таъкидлаш керак, «Халқлар дўстлиги» майдони салкам 12 кун ичида бутунлай ўзгача қиёфага кирди. Олдинлари сув оқмайдиган сунъий ҳовуз ва файзсиз мармар майдон қисқа кунлар ичида пойтахтнинг яна бир кўркам манзилгоҳи айланди. Эслатиб ўтамиз, Ўзбекистон Президенти томонидан 26 апрель куни бўлиб ўтган видеоселектор йиғилишида ҳозирда «Истиқлол» санъат саройи деб номланиб келаётган саройга, унинг олд майдонига ҳамда «Бунёдкор» метро бекатига унинг аввалги «Халқлар дўстлиги» номини қайтариб қўйиш, шунингдек, Иккинчи жаҳон уруши даврида 14 фарзандни ўз бағрига олган Шомаҳмудовлар монументини жойига қайтариш мақсадида аввал шу ном билан юритилган кўчага унинг номини қайта тиклаш юзасидан таклифлар берилган эди.
Ҳоким соат 10:15 гача майдоннинг ҳар бир қаричини кўздан кечириб чиқиб, бажарилиши керак бўлган ишлар, камчиликлар юзасидан тегишли кўрсатмаларни берди.
«Атиги 12 кун ичида майдоннинг кўришини бутунлай ўзгартириб юбордик. Эндиликда бу ер ‘Халқлар дўстлиги’ майдони деб юритилади ва исталган одам бу ерга келиб мароқли ҳордиқ чиқариши, иссиқ кунларда фонтандан отилаётган муздек сувлар тафтидан баҳраманд бўлиши мумкин», — дейди Даврон Ҳидоятов.
Соат 10:30 да Бунёдкор ва Чўпонота кўчалари кесишмасида «Ўзбекистон темир йўллари» АЖга қарашли «Кўприкқурилиш» трести унитар корхонаси мутахассислари томонидан барпо этилаётган кўприкнинг қурилиш ишларига бағишланган йиғилиш бўлиб ўтди. Йиғилишда кўприкни қуриш борасида юзага келаётган муаммолар, уларни бартараф этиш йўллари, маслаҳатлар, таклифлар тингланди ва тегишли кўрсатмалар берилди.
Замонавий йўл ўтказгичнинг умумий узунлиги 667,5 метрни ташкил этади. Эстакада қисмининг узунлиги 488,5 метр бўлиб, баландлиги 8 метр, кенглиги эса 24,5 метрни ташкил этиб, 21 та устун оралиғида барпо этилмоқда. Эътиборлиси, бу ерда пиёдалар учун ҳам қатор қулайликлар яратилади. Хусусан, умумий узунлиги 124 метр бўлган иккита пиёдалар ўтиш кўприги қурилади, шунингдек, ёши кекса ва ногиронлар учун махсус лифт ҳамда эскалатор ўрнатилади. Янги бунёд этилаётган йўл ўтказгичнинг ёритиш тизими ҳам жаҳон андозларига мос равишда барпо этилиши кўзда тутилган. Шу кунга қадар жами йўл ўтказгичнинг 256 та тўсинидан 192 таси ўрнатилди. Чиқиш ва тушиш қисмларидан 60 фоиз тиргак деворлари мустаҳкамланди. 276 та призматик қозиқдан 206 таси қоқилди. Ушбу кўприкни июнь ойи бошларида фойдаланишга топшириш режалаштирилган.
Бир соатдан ошиқроқ давом этган мажлисдан кейин Чилонзор туманидаги «Замин» тўйхонасида байрам муносабати билан халққа ош тарқатилди. Туман ҳокими ушбу тадбирга ҳам ташриф буюрди.
Соат 12:00 дан ўтгач яна «Халқалар дўстлиги» майдонига қайтган ҳоким ободонлаштириш ишларини ўз назорати остига олди. Тошкент шаҳар ҳокимининг ўринбосари Нодиржон Максумов ҳам амалга оширилаётган ишлар билан танишиш мақсадида майдонга ташриф буюриб, ўз таклифларини Даврон Ҳидоятовга билдирди.
Майдонга кириш қисмдан — «Халқлар дўстлиги» метро бекатининг ёнидан ўрин олган автобус бекати мутлақ замонавий усулда қурилган бўлиб, унинг ичидаги барча техникалар (ёритиш тизимлари, кондиционерлар) қуёш энергияси ёрдамида ишлайди.
Изоҳ (0)