Бокс: 8 та жанг 8 та ғалаба. Азизбек Абдуғофуров WBC Silver чемпионлик камари​ соҳибига айланди, Қудратилло Абдуқаҳҳоров яна ғалаба қозонди

5 май санасида Тошкентда ўзбекистонлик профессионал боксчилар иштирокида жанг оқшоми бўлиб ўтиши ҳақида аввалроқ хабар берилган эди. Ҳозиргина барча жанглар ўз ниҳоясига етди. Бу ҳақда «Оламспорт» нашри хабар берди.

Бокс оқшомининг биринчи жанги супер енгил 63,5 вазн тоифасида ўзбекистонлик Жамшид Нажмиддинов (17 ғалаба, 1 мағлубият, 0 дуранг) грузиялик Анзор Гамгебелига қарши рингга чиқди. Биринчи раундинг ўзида рақибини 3 марта нокдаун ҳолатига туширган Жамшид жангни муддатидан аввал ўз фойдасига ҳал этди. Бу унинг проф боксдаги 18-ғалабаси бўлди.

Иккинчи жанг Бекзод Турсунбоев ҳамда индонезиялик Рой Мухлис ўртасида кечди. Бекзод Турсунбоев проф боксдаги биринчи жангининг биринчи раундидаёқ рақибини нокаутга учратди. Шу тариқа иккинчи жанг ҳам ўзбекистонлик боксчи ғалабаси билан якунланди.

Кечанинг учинчи жанги биринчи оғир вазн 90 кг тоифаси вакиллари ўртасида бўлиб ўтди. Унда ўзбекистонлик Умид Рустамов грузиялик Давид Рибаконига қарши рингга кўтарилди. Бу жанг Умиднинг фаолиятидаги тўртинчиси эди. Уччала жангда ҳам ғалабага эришган боксчи тўртинчи жангни ҳам ўз фойдасига ҳал этди. У рақиби Рибаконини 3-раундда нокаутга учратиб ғалабага эришди.

Тўртинчи жангда яна бир ўзбек боксчиси 69,85 кг вазн тоифасида Улуғбек Собиров грузиялик Жоржи Унгиадзега қарши рингга кўтарилди. Бу жанг иккинчи раунддаёқ якунига етди. Улуғбек рақибини нокаутга учратди.

Бешинчи жангда 53,52 кг вазн тоифасида ўзбекистонлик Олим Назаров грузиялик Квича Гиголашвилига қарши рингга чиқди. 10 раунд давом этган жангда Олим Назаров очколар бўйича ғалабага эришди.

Олтинчи жанг 66,67 кг вазн тоифасида ўзбекистонлик Жасур Абдураҳмонов индонезиялик Стевие Онген Фернандусга қарши рингга кўтарилди. 8 раунд давом этган жангда Жасур Абдураҳмонов очколар ҳисобига ғалаба қозонди ва ўзининг проф боксдаги ғалабалари сонини бештага етказиб олди.

Еттинчи жангда WBC Silver чемпионлик камари соҳиби Қудратилло Абдуқаҳҳоров танзаниялик Тваха Кидукуга қарши рингга кўтарилди. 66,6 кг вазнда 8 раунд этиб жангда ҳакамлар бир овоздан Қудратиллони ғолиб деб топди.

Оқшомнинг саккизинчи, марказий жангида ўзбекистонлик Азизбек Абдуғофуров собиқ жаҳон чемпиони россиялик Дмитрий Чудиновга қарши рингга кўтарилди. 12 раунд бўлиб ўтган жангда Абуғофуров ғалабага эришиб, WBC Silver чемпионлик камари соҳибига айланди.

Шу тариқа оқшомдаги барча жангларда ўзбекистонлик боксчиларнинг қўли баланд келди.