Ўзбекистон Республикаси Президенти Шавкат Мирзиёев томонидан 2018 йил 26 апрель куни ўтказилган мажлисда белгилаб берилган вазифалардан келиб чиқиб, ҳозирги кунда «Ёшлар – Ўзбекистон келажаги» Давлат дастури лойиҳаси ишлаб чиқилмоқда. Бу ҳақда Ўзбекистон Ёшлар иттифоқи матбуот хизмати хабар бермоқда.
Бу мақсадда Ўзбекистон Ёшлар иттифоқи Марказий Кенгашида манфаатдор вазирлик ва идоралар раҳбарларидан иборат Республика ишчи гуруҳи тузилиб, тезкор Штаб фаолияти йўлга қўйилди.
28—30 апрель кунлари Ўзбекистон ёшлар иттифоқи Марказий Кенгашида дастур лойиҳаси тайёрланиб, тегишли вазирлик-идораларнинг раҳбарлари, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимларининг ёшлар масалалари бўйича ўринбосарлари ҳамда Ўзбекистон Ёшлар иттифоқининг ҳудудий кенгашлари раислари, шунингдек, малакали мутахасссислар иштирокида кенг муҳокама қилинди.
«Ёшлар – Ўзбекистон келажаги» Давлат дастури лойиҳаси 5 та йўналишда 131 та банддан иборат бўлиб,ёшларни тадбиркорликка жалб қилиш, уларнинг ғоя ва ташаббусларини қўллаб-қувватлаш, ёшларни ижтимоий ҳимоялаш ва бандлигини таъминлаш, ёшлар жиноятчилигини олдини олиш, маънавий-маърифий тадбирлар ўтказиш каби муҳим масалаларни қамраб олмоқда.
Дастур лойиҳасига кўра, Ўзбекистон Республикасининг 10 та Қонуни лойиҳаси, Ўзбекистон Республикаси Президентининг 3 та қарори, Вазирлар Маҳкамасининг 12 та қарори лойиҳаларини ишлаб чиқиш кўзда тутилмоқда.
«Дастурга киритиш учун таклифлар билдиришни истовчилар ўз лойиҳа ва ташаббусларини tahlil@yi.uz манзилига йўллашлари мумкинлигини билдирамиз», — дейилади хабарда.
Изоҳ (0)