Россия ва Туркиянинг қатор авиакомпаниялари Қарши аэропортидаги «очиқ осмон» режимига қизиқиш билдирмоқда. Бу ҳақда Туризмни ривожлантириш давлат қўмитаси раиси Азиз Абдуҳакимовга асосланиб, Sputnik хабар берди.
«Очиқ осмон» режими амал қиладиган аэропортга хорижий авиаташувчилар ҳеч бир чекловларсиз парвозларни амалга ошириш имконига эга бўлади. Масалан, Россияда Сочи, Владивосток ва Калининград аэропортлари ана шундай режимда иш олиб боради. Камтарона ҳисоб-китобларга кўра, бундай режимнинг жорий этилиши йўловчилар оқимини 25—30%га оширади.
«Ўзбекистонда лоукостерларни жалб этиш ва ‘очиқ осмон’ режимини жорий этиш бўйича Қарши аэропортида илк лойиҳа йўлга қўйилди. Ҳозирда кўплаб авиакомпаниялар ушбу аэропортга парвозларни амалга оширишга қизиқиш билдирмоқда. Булар Россиянинг Nord ва ‘Уралские авиалинии’ ҳамда Туркиянинг Pegasus Airlines ва Atlasglobal компанияларидир», — дейди Қўмитаси раиси.
Абдуҳакимовнинг фикрича, туризмнинг ривожланиши Ўзбекистонда кучли Миллий авиаташувчининг бўлишига ҳам боғлиқ.
«Бу шунчаки сўзлар эмас, бунга асослар етарли. Бизнинг аэропортларимиз географик жиҳатдан жуда қулай жойлашган. Улар Жануби Шарқий Осиёдан Европага келадиган оқимни ўзига тортиб олган Дубай ёки Истанбулга нисбатан анчагина қулай. Аэропортларимиз ушбу соҳада минтақада етакчиликка интилаётган Қозоғистон аэропортларига нисбатан ҳам қулай», — деди Абдуҳакимов.
Шунингдек, таъкидланишича, минтақада етакчи бўлиш учун авиаташувлар бошқарув тизими жиддий ислоҳ қилиш, «Ўзбекистон ҳаво йўллари» фаолиятини муқобиллаштириш даркор.
Эслатиб ўтамиз, Президентнинг февраль ойида қабул қилинган «Кириш туризмини ривожлантириш чора-тадбирлари тўғрисида»ги қарорида «Қарши» аэропортини «Ўзбекистон ҳаво йўллари» МАК таркибидан чиқариш кўзда тутилганди.
Изоҳ (0)