Мустақиллик ҳимоячиси, юрт учун жонини фидо қилган қаҳрамон лейтенант Бобуржон Ғаниевнинг бюсти Марғилон шаҳридаги ўзи таҳсил олган 13-умумтаълим мактабида ўрнатилди. Бу ҳақда Мудофаа вазирлиги матбуот хизмати хабар берди.
Хотира ва Қадрлаш куни муносабати билан Шарқий ҳарбий округи ҳарбий хизматчилари, давлат ва жамоат ташкилотлари вакиллари, мактаб ўқувчилари Бобуржон Ғаниевнинг уй-музейига ҳамда 13-мактабга ташриф буюришди. Ёдгорлик олдида Марғилон шаҳридаги Йўрмадўз маҳалласида туғилиб вояга етган Бобуржон Ғаниевнинг болалиги ва ўспиринлиги, Ватан ҳимояси йўлидаги қаҳрамонлиги ёдга олинди.
– Юртимиз тинчлиги ва осойишталиги йўлида ҳалок бўлганлар ҳамиша қалбимизда мангу яшайди. Бобуржон Ғаниев ҳам ана шундай мард ўғлонлардан бири эди. Мактабимизда Бобуржонни ўқигани ва бюсти ўрнатилгани биз учун катта шараф. У кўрсатган қаҳрамонлиги ўсиб келаётган ёшларни Ватанга садоқат руҳида тарбиялашда муҳим аҳамиятга эга», – дейди 13-умумтаълим мактаби директори ўринбосари Ш.Аҳмедова.
2000 йил август ойида Сурхондарё вилоятининг Сариосиё ва Узун туманларининг тоғли ҳудудларида ноқонуний террорчи гуруҳларга қарши мардонавор курашган ҳарбий хизматчиларнинг орасида гуруҳ командири ўринбосари лейтенант Бобуржон Ғаниев ҳам бор эди. Жангда у террорчиларга қақшатгич зарба бергани, ўзи ярадор бўлишига қарамасдан сафдоши сержант Улуғбек Барноевни (марҳум) қутқариб қолишга интилгани таҳсинга сазовордир. Ўзбекистон Республикаси Президентининг фармонига мувофиқ Бобуржон Ғаниев II-даражали «Шон-шараф» ордени билан мукофотланган (вафотидан кейин).
Қаҳрамоннинг онаси Мунаввархон ая ҳаётининг эллик уч йилини ёш авлод таълим-тарбиясига бағишлаган фидойи маърифатчидир. Унинг ўзи ҳақидаги суҳбатлар ҳам беихтиёр Бобуржонга бориб тақалаверади: «‘Онажон, катта бўлганимда сизни ҳаж зиёратига олиб бораман’ дерди. Бобуржон ҳалок бўлганидан кейин акалари унинг бу орзусини амалга оширди. Шу кунларда ўғлим Бобуржоннинг хотирасини ёд этиб келаётганлар жуда кўп. Ватанимиз сарҳадларини мардонавор қўриқлаб, жонини фидо этган фарзандим билан доимо фахрланаман. Президентимиз томонидан кўрсатилаётган юксак эътибор учун миннатдормиз, – дейди қаҳрамоннинг онаси.
Эслатиб ўтамиз, Вазирлар Маҳкамасининг 2018 йил 15 февралдаги 116-сон фармойишига асосан мустақиллик йилларида хизмат бурчини бажариш чоғида ҳалок бўлган ҳарбий хизматларнинг хотирасини абадийлаштириш мақсадида Мудофаа вазирлигидан 11 нафар ҳарбий хизматчисига бюст ўрнатилмоқда.
Изоҳ (0)