Жанубий Кореяда нашр этиладиган «UzKor Economy» ҳафталик журналининг 2018 йил апрель ойи сонларидан бирида Жанубий Корея ишбилармон доираларининг Фарғона вилоятига ташрифи, Фарғона шаҳрида ўтказилган катта иқтисодий бизнес форуми, «Қўқон» эркин иқтисодий зонасидаги шароитлар ҳамда вилоятнинг инвестицион салоҳияти ҳақида мақола чоп этилди. Бу ҳақда «Дарё» мухбири Азизжон Эрматов хабар берди.
Мазкур мақола Жанубий Кореянинг Evergreen Motors Group компания раиси Ким Чанг Кён бошчилигидаги бизнес-делегация вакилларининг жорий йил 5—6 март кунлари Фарғона вилоятига қилган ташрифи якунлари бўйича тайёрланган.
Фарғонада ўтган Корея Республикаси ишбилармонлари бизнес форумида жаҳон миқёсида тилга тушган Hyundai, KIA, Daewoo каби корпорациялар, Cheonnam National University Hospital тиббиёт маркази, Seojeong University олий таълим маскани, КDB банк муассасаси, Hankook Suward CO. LTD сантехника маҳсулотлари ишлаб чиқариш заводи ўртасида қўшма корхоналар ташкил этиш, таълим, тиббиётда ҳамкорлик қилиш бўйича шартномалар имзоланган эди.
Мақолада хорижлик тадбиркорлар икки кун давомида Фарғона вилоятининг иқтисодий, инвестицион, туристик салоҳияти ва бошқа соҳалар билан танишганликлари, вилоятда ташкил этилаётган «Қўқон» эркин иқтисодий зонаси, Indorama Kokand texstile қўшма корхонасида бизнес учун яратилган шароит уларда катта таассурот уйғотганлиги ёзилади.
Шунингдек, вилоят ҳокимининг республикада, жумладан, Фарғона вилоятида инвестицион иқлимни ўрганиш, ҳамкорлик қилиш учун барча эшиклар кенг очиқ, учрашув ва ҳамкорликлар нафақат иқтисодиёт соҳасида, балки таълим, илм ва маданият соҳаларида ҳам икки халқнинг яқинлашувида янги поғона бўлади, деган фикрлари Жанубий Корея жамоатчилигида кенг муҳокама қилинаётгани таъкидланган.
Вилоят ҳокимлигидан олинган маълумотга кўра, 2017 йилда фарғоналик ишбилармонларнинг Корея Республикаси билан ташқи савдо айланмаси ҳажми 79 миллион АҚШ долларини, шундан, экспорт 37,4 миллион, импорт 41,7 миллион АҚШ долларини ташкил этган. Бугунги кунда вилоятда Жанубий Корея билан ҳамкорликда 18 та хорижий инвестицияли корхоналар фаолият кўрсатмоқда.
Изоҳ (0)