Осиё Олимпия Кенгаши раҳбари шайх Аҳмад ал-Фаҳад ал-Сабаҳ Ўзбекистонга келди (фото)

Осиё Олимпия Кенгаши ва Миллий олимпия қўмиталари халқаро ассоциацияси президенти шайх Аҳмад ал-Фаҳад ал-Сабаҳ бугун ташриф билан Ўзбекистонга келди. Бу ҳақда МОҚ ахборот хизмати маълум қилди.

Шайх ал-Сабаҳни МОҚ Президенти Умид Аҳмаджонов ҳамда Жисмоний тарбия ва спорт вазири Шоакром Исроилов кутиб олди. Томонлар иштирокида расмий учрашув бўлиб ўтди. Учрашув давомида мутасаддилар ҳамкорлик ришталарини мустаҳкамлаш, ўзаро муносабатларни янада ривожлантириш, алоқаларини кенгайтириш каби масалаларга тўхталди.

Аввало, сизни Ўзбекистон заминида кўриб турганимиздан бениҳоя хурсандман. Осиё спорти ривожланишида, тараққий этишида сизнинг ҳиссангиз жуда катта. Буни биз жуда яхши биламиз. Биз ўзбек спортига катта режа ва мақсадлар билан кириб келганмиз. Ана шу режаларни амалга оширишда, қолаверса мамлакат спортида ислоҳотларни олиб боришда ёрдамингизга ва қўллаб-қувватлашингизга ишонамиз. Ёнингизда елкама-елка туриб, хизмат қилишга ҳам тайёрмиз. Шу жумладан, миллий спортимиз ҳисобланган курашни қўллаб-қувватлаётганингиз учун сизга алоҳида раҳмат. Уни Осиё ўйинлари дастурига киритилишида сиз ва Ҳайдар Фармоннинг ҳиссаси катта эканлигини жуда яхши биламиз. Шу билан биргаликда, энди курашни келгуси Олимпия ўйинлари дастурига киритилишида ёрдам берсангиз, бу биз учун бир олам бахт бўлар эди. Бундан жуда ҳам хурсанд бўлардик. Бу борада сизнинг кўмагингизга ишонамиз.

Умид Аҳмаджонов, МОҚ президенти

Сиз билан учрашиб турганимдан хурсандман. Очиғи, мен ҳам ўз уйимга келдим деб ҳисоблайман. Чунки, бу менинг Ўзбекистонга илк ташрифим эмас. Бу ерга келганимда доимо ўзбек халқининг меҳмондўстлиги билан ҳайрон қолдиришади, бундан жуда завқ оламан. Шунинг учун, мен Ўзбекистонни ўзимнинг иккинчи уйим деб бемалол айта оламан. Ўзбек спорти ишончли ва мустаҳкам қўлларда эканлигига ишончим комил. Сизнинг Паралимпия миллий ассоциацияси бошқарувида амалга оширган ишларингизни, ташкилотчилик борасидаги маҳоратингизни жуда яхши биламан. Шу билан биргаликда, Марказий Осиё футбол федерациялари ассоциацияси – CAFA’га раҳбар бўлганингиздан ҳам бениҳоя мамнун бўлдим. Мамлакатингиз спортчиларида салоҳият жуда юқори.Кураш деганда кўз олдимга доимо Ўзбекистон мамлакати келади. Ҳамкорликда катта ютуқларга эришишимизга ишонаман. Таъкидлаб ўтишни истардимки, сиз ёш ва ғайратлисиз. Ҳали бошқарувчи сифатида ўсишингиз керак. Фақат Ўзбекистон ичида қолмасдан, халқаро спорт ташкилотлари раҳбарлик лавозимларида меҳнат қилиб, келажакда у ердаги фаолиятингиз орқали Ўзбекистон спортига фойда келтирасиз деб ишонаман.

 шайх Аҳмад ал-Фаҳад ал-Сабаҳ, Осиё Олимпия Кенгаши ва Миллий олимпия қўмиталари халқаро ассоциацияси президенти