Япониянинг Нагоя университети вице-президенти, профессор Фумио Исодо бошчилигидаги делегация Тошкентдаги ўзбек тили ва адабиёти университетига ташриф буюрди. Бу ҳақда университет ахборот хизмати «Дарё»га маълум қилди.
Ташрифдан кўзланган мақсад Нагоя университети Осиё Сателит кампуси лойиҳаси доирасида ўзбекистонлик ёш олимларни PhD докторантурада масофавий ўқитиш ва Нагоя университети доктори илмий даражасини беришдан иборат.
Делегация билан ҳамкорлик масаласидаги музокараларда ТошДЎТАУ ректори Шуҳрат Сирожиддинов ҳамда университет ҳузуридаги педагог кадрларни қайта тайёрлаш ва малакасини ошириш тармоқ маркази директори Нодира Эгамбердиева, қолаверса, япониялик олимлар Ийити Имамура, Юрико Нишизаки иштирок этди.
Музокалар якунида Нагоя университети келгуси ўқув йилидан бошлаб ўзбекистонлик 2 нафар ёш олимни докторантурада масофавий ўқитади ва ҳар чорак якунида тадқиқотчи Японияга ташриф буюриб, Нагоя университетида семинарларда иштирок этади, қолаверса, докторантга бириктирилган илмий раҳбар ҳам Ўзбекистонга ташриф буюриб, илмий изланувчига амалий ёрдам беришига келишилди.
Изоҳ (0)