Фарғона вилоятининг Ўзбекистон тумани Шўрсув шаҳарчасида йилига 1 миллион тонна цемент ва 33 миллион квадрат метр гипсокартон ишлаб чиқаришга мўлжалланган қўшма корхоналар ташкил этилади. Бу ҳақда «Дарё» мухбири Азизжон Эрматов хабар берди.
Бу борада Хитойнинг «Pekin Kajshen Triumf» компанияси ва «Жўйдам таъмир қурилиш» масъулияти чекланган жамияти ўртасида ҳамкорлик шартномаси имзоланди.
Лойиҳанинг умумий қиймати 206,83 миллион долларни ташкил этади ва 10 йил ичида барча солиқ турларидан давлатга 399 миллион доллар фойда келтириши кутилмоқда. Мазкур лойиҳаларни амалга ошириш орқали 2000 та янги иш ўрни яратилади.
Ишлаб чиқариш учун зарур бўлган хом ашё маҳсулотлари тўлиқ маҳаллий конлардан олинади. Бу маҳсулот таннархининг нисбатан арзон бўлишини таъминлайди. Маҳсулотларнинг асосий қисми хорижий давлатларга, жумладан, қўшни мамлакатларга эскпорт қилинади.
Шартномада лойиҳалардан олинадиган даромад ҳисобидан Шоҳимардонда ички туризмни ривожлантириш ҳамда Сўх туманида янги ишлаб чиқариш тармоқларини йўлга қўйиш кўзда тутилган.
«Президентингизнинг хорижий инвесторларга Ўзбекистонда фаолият юритиши учун кенг йўл очиб бераётгани эътирофга лойиқ. Биз мавжуд шароитлардан жуда мамнунмиз. Ўзбекистон дунёнинг энг тез ривожланаётган 10 мамлакати қаторига киргани ҳам амалга оширилаётган иқтисодий ислоҳотлар натижасидир,» – дейди «Pekin Kajshen Triumf» компанияси директорининг ўринбосари Сао Юй Бо.
«Pekin Kajshen Triumf» компанияси цемент ва қурилиш маҳсулотлари ишлаб чиқариш бўйича йирик ва ишончли сармоядорлардан саналади. Компания дунёнинг 37 мамлакатида ўз корхоналарига эга.
Тез орада компания томонидан Андижон вилоятининг Булоқбоши туманида кунига минг тонна оҳак ишлаб чиқаришга мўлжалланган яна бир қўшма корхона ташкил этилади.
Изоҳ (0)