Ўзбекистон Мудофаа вазири маслаҳатчиси нафақадаги генерал-полковник Рустам Аҳмедов Тошкент ҳарбий округидаги умумқўшин дала ўқув майдонида десантчиларнинг жанговар тайёргарлик машғулотлари билан яқиндан танишди. Бу ҳақда вазирлик матбуот хизмати «Дарё»га хабар бермоқда.
«Бой ҳаётий тажрибага эга бўлган Мудофаа вазирлиги фахрийси кексалигига қарамай ёш ва навқирон ҳарбий хизматчиларнинг жанговар ва маънавий-маърифий тайёргарлик машғулотлари, уларнинг турмуши, хизмат шароитлари билан танишиш учун ҳарбий округларга хизмат сафарларини уюштиряпти», — дейилади хабарда.
Бу гал десантчилардан иборат янги таркибдаги жанговар бўлинма – батальон тактик гуруҳининг дала ўқувларига тайёргарлик жараёнлари билан танишаётган Рустам Аҳмедов йигитларга у хизмат қилган йилларда рўй берган қизиқарли воқеалар, бугунги кунда ҳарбий хизмат нуфузи ва шарафи юксалаётгани ҳақида фикрини айтди. Олдинги ва бугунги армия ўртасида жуда катта фарқ, кескин ўзгаришни кузатаётганидан ғоят бахтиёр эканини, Ўзбекистонда Қуролли Кучлар фахрийларига кўрсатилаётган эътибор уни руҳлантираётганини ифтихор билан сўзлаб берди.
Ташриф давомида у навбатдаги тактик машғулоти арафасида саф кўригидан ўтаётган ҳарбий хизматчиларнинг анжом-аслаҳаларини командирлар бошчилигида кўздан кечирди. Самимий суҳбат давомида фахрий ҳарбий хизматчиларга хизматда фақат юксак натижаларга эришишни тилади.
Изоҳ (0)