Ўзбек банкирларидан олинган ярим млн долларлик пора, Тошкент метросида янграган уруш даври қўшиқлари, «Маҳаллада дув-дув гап» режиссёрининг вафоти ва куннинг бошқа муҳим хабарлари

25 апрелнинг эътиборга молик янгиликлари — «Дарё»нинг кечки дайжестида.

1. Режиссёр Шуҳрат Аббосов оламдан ўтди. У «Маҳаллада дув-дув гап», «Сен етим эмассан», «Тошкент — нон шаҳри» каби ўзбек киноси дурдоналари режиссёри эди.

2. Видео: Тошкент метросида ҳарбий қўшиқлар куйланди. Ушбу акция Мудофаа вазирлиги томонидан 9 май муносабати билан ташкил этилди. Ҳамма хурсанд, ҳамма шод!

3. Hi-Tech Bank мутасаддилари қамалмаслиги учун улардан 500 минг доллар пора олган шахслар қўлга олинди. Яна бир киши бошқа бир айбланувчидан 200 минг доллар пора олгани айтилмоқда.

4. Торонтода одамлар устига микроавтобус ҳайдаган шахс МДҲлик бўлиб чиқди. 23 апрель куни микроавтобус пиёдалар устига чиқиб кетиши оқибатида 10 киши қурбон бўлган, 16 киши жароҳатланган эди.

5. Ўзбекистоннинг бир неча шаҳарларида йўл кира нархи ошиши кутилмоқда. Ушбу қарорлар лойиҳалари муҳокамаси якунига етишига оз муддат қолган бўлса-да, муҳокамаларда саноқли фуқаролар иштирок этган.

6. «Намозга машинада эмас, пиёда келишнинг савоби ортиқ». «Давр» жума намози вақтидаги тирбандликлар сабабини излади.

7. Тошкент вилоятида бир кунда 5 киши ўз жонига қасд қилди. Уларнинг камида иккитасига «арзимас можаролар» сабаб бўлган. «Ёшлар» телеканали мухбири воқеаларни ўрганди.

8. Ўзбекистонда товуқ гўшти таркибидаги сунъий қўшилган сув миқдорини 4 фоиздан ошириш тақиқланди. 1 майдан «Ўзстандарт» агентлигининг янги стандарти кучга кириши маълум қилинди.

9. Андижонда алимент тўламаслик учун рафиқаси билан ярашмоқчи бўлган эркак уни ўлдириб қўйди. Аёл ярашиш таклифига рози бўлмаган.