Жиноят ишлари юзасидан олиб борилаётган тергов ҳаракатлари давомида алоҳида шахслар жиноят ишларига алоқадорларнинг қариндошлари ишончига кириб, уларни жиноят ишларини ижобий ҳал этиш учун пора бериш зарурлиги ҳақидаги ёлғон маълумотга ишонтириб, фирибгарлик йўли билан уларнинг пул маблағлари ва моддий бойикларини қўлга киритаётганликлари ҳолатлари аниқланмоқда. Бу ҳақда Ўзбекистон Бош прокуратураси 25 апрель куни баёнот берди.
Хусусан, жавобгарликка тортилмаслигини гўёки мансабдор шахсларга пора бериш орқали таъминлаш эвазига айбланувчи Я.М.нинг 200 минг доллар миқдоридаги пул маблағларини юқори қайд этилган йўл билан қўлга киритган фуқаро А.Саркисян 2018 йил 22 апрель куни Бош прокуратура томонидан қўлга олинган.
Бошқа бир ҳолат: 2016—2017 йиллар давомида Ф.Андреев, Р.Рафиқов, Д.Машковский учта жиноят иши бўйича айбланаётганларнинг қариндошлари ишончига кириб, уларга жиноий жавобгарликдан озод этилиш ва оқланишни ваъда қилган. Бунинг учун мансабдор шахсларга 150 минг доллар миқдорида пора бериш кераклиги ҳақида айтиб уларни алдаган, фирибгарлик йўли билан умумий ҳисобда 50 минг доллар ва 20 миллион сўмга яқин пулни қўлга киритган.
Аввалроқ Бош прокуратура томонидан Hi-Tech Bank мутасаддилари қамалмаслигини таъминлаш эвазига улардан 500 минг доллар миқдорида пора олган шахслар қўлга олингани ҳақида хабар берилган эди.
Мавзуга доир: Hi-Tech Bank мутасаддилари қамалмаслиги учун улардан 500 минг доллар пора олган шахслар қўлга олинди
Изоҳ: Бош прокуратура ахборотида келтирилган исм-шарифлар ва инициаллар тергов манфаатларидан келиб чиқиб ўзгартирилган.
Изоҳ (0)