Ўзбекистонда суратга олинган «Сабот» номли янги кинофильм Москва халқаро кинофестивалида томошабинларнинг катта қизиқишини уйғотди, деб ёзади «Sputnik Ўзбекистон».
Фильм намойишида «Октябрь» кинотеатрининг энг катта залларидан бири 70 фоизга томошабинларга тўлди. Фестиваль учун бу жуда яхши кўрсатгич.
Ўзбекистон киносига Москвада қизиқиш катта. Ўтган асрнинг 40 йилларидан 1991 йилга қадар ўзбек кино мактаби СССРда энг кучли мактаблардан бири ҳисобланар эди. Кейин анча вақт давомида ўзбек киноси ҳақида ҳеч нарса эшитилмаган эди. Шу сабабдан ҳам Ўзбекистон киносининг Москвага келишининг ўзи катта воқеага айланди.
Кино намойиши анча асабий муҳитда ўтди. Фильмнинг 40-дақиқасида русча таржима йўқолиб қолди. Фильм қаҳрамонлари ўзбекча, баъзан қорақалпоқча гапирар эди. Фильм остида эса инглизча титрлар кўрсатилиб турди.Кино тўхтатилиб, техник носозликни тузатишга 20 дақиқалар кетди. Ушбу вақт давомида кинозалда фильм қизғин муҳокама қилинди.
«Сабот» фильми якунига етгач, москвалик журналистлар, кино мутахассислари ва танқидчилари фильм яратувчиларини гулдирос қарсаклар билан олқишлади.
Хўш, фильм ўзи нима ҳақида? Фильмда 1989 йил Қорақалпоғистоннинг чекка бир қишлоғи тасвирланган. У ерда бир собиқ ҳарбий, камсуқум ва қаттиққўл киши яшайди. Унинг атрофидаги бор мебел фақат стол, каравот ва телевизор. Унинг турмуш ўртоғи оламдан ўтган, ўғли эса у билан урушиб қолган ва набираси билан учрашишга рухсат бермайди. Собиқ ҳарбий мактабда жисмоний тарбия ўқитувчиси бўлиб ишлайди ва кунларнинг бирида у саратон касалига чалингани маълум бўлади.
Вафот этаётган собиқ ҳарбийнинг бу дунёда амалга ошириши керак бўлган учта иши қолади: набирасини кўриш, мактабга сув олиб келиш ва бир аблаҳдан қасос олиш.
Изоҳ (0)