Ўзбекистон Мудофаа вазирлиги ҳарбий хизматчилари томонидан 22 апрель куни мамлакатдаги биродарлик ва ҳарбий қабристонлар, уруш ва меҳнат фахрийлари ҳамда хизмат бурчини бажариш чоғида ҳалок бўлган ҳарбийлар, шунингдек, бошқа қабрлар тозаланиб, тартибга келтириш оммавий акцияси ўтказилади.
Вазирлик матбуот хизматидан «Дарё»га маълум қилишларича, акция доирасида қабристон панжараларини бўяш, гул экиш, зарурат бўлса — қабрлар ёнига курси ўрнатиш, кириш дарвоза ва темир панжараларни пайвандлаш каби ишлар амалга оширилиши кўзда тутилган.
Қайд этишларича, Мудофаа вазирлиги қўшинларида 9 май — «Хотира ва Қадрлаш кун»га тайёргарлик кўриш ва уни ўтказиш бўйича чора-тадбирлар дастури ишлаб чиқилган.
Унга кўра ҳарбий қисмлар жойлашган ҳудудлардаги қабристонларни ободонлаштириш, «Мотамсаро она» хайкали пойига гулчамбарлар қўйиш, уруш ва меҳнат фахрийлари учун расмий қабул маросимлари, «Авлодлар учрашуви», «Эъзоз» ва «Эҳтиром» учрашувлари, Иккинчи Жаҳон уруши вақтидаги ҳарбий техникаларнинг намойишини ўтказиш ҳамда байрам концертлари ва салютни ташкил этиш каби тадбирлар режалаштирилган.
Изоҳ (0)