Исландияда жиноятчи қамоқдан қочди ва Швецияга бош вазир билан битта самолётда учди

Исландия тарихидаги энг катта ўғрилик учун қамалган Синдри Тор Стеффансон қамоқдан қочди ва Швецияга учиб кетди, деб хабар беради TJournal.

Қайд этилишича, ўғри мамлакат бош вазири билан бир самолётда учган.

Полициянинг маълумот беришича, Стеффансон қамоқдан дераза орқали қочган ва Кеблавик шаҳридаги халқаро аэропортга йўл олган.

Швеция ва Исландия Шенген зонасида жойлашгани учун аэропортда ундан ҳеч ким паспорт сўрамаган.

Стеффансон учган самолётда Исландия бош вазири Катрин Якобсдоуттир ҳам бўлган. У Ҳиндистон бош вазири билан музокара ўтказиш учун Стокгольмга учиб келаётган эди.

Қайд этилишича, ўғри самолётга чиқиш учун кимнингдир паспортидан фойдаланган. Шунинг учун терговчилар Стеффансоннинг шериги бўлганлигини тахмин қилмоқда.

Полиция ишга алоқадорликда гумонланаётган икки кишини сўроқ қилган.

Стеффансон хавфсизлиги кам даражада таъминланган маҳаллий қамоқхонага жойлаштирилган эди. Бу ерда жиноятчиларга интернет ва телефондан фойдаланиш имкони берилади. Шунингдек, қамоқхона биноси деворлар билан ҳам ўралмаган эди.