11 апрель куни жиноий ишлар бўйича Тошкент шаҳар судида Бобомурод Абдуллаев, Ҳаётхон Насриддинов, Шавкат Оллоёров ва Равшан Салаев иши бўйича суд мажлиси бўлиб ўтди. Бу ҳақда «Газета.uz» хабар бермоқда.
Олдинги мажлисда раис судья Зафар Нурматов Бобомурод Абдуллаевни ҳимоя қилаётган адвокат Сергей Майоровнинг илтимосини қондириб, Абдуллаев ишини олиб борган собиқ МХХ (ҳозир ДХХ) терговчиларини кўрсатма бериш учун чақирди.
Бундан олдин сўроқ учун «Жамият» газетасидан гувоҳ Қаҳрамон Сайдалиев чақирилган эди. У МХХ тезкор ходими Тимур Якубовнинг мурожаатига кўра интернетдан «Усмон Ҳақназаров» мақолаларини топишга ёрдам берган эди.
Гувоҳнинг сўзларига қараганда, улар МХХ терговчилари ва икки холис билан бирга интернет-кафега бориб, махсус браузер орқали блокланган мақолаларни «Ўзбекистон халқ ҳаракати» сайтида очган. «Усмон Ҳақназаров» бўлимида унинг имзоси остида 2013–2017 йиллар орасида юздан ортиқ мақола чоп этилган. Улар Word дастурига кўчирилиб, принтердан чиқарилган. Иш жами 5–6 соат вақт олган.
Шундан сўнг суд давлат айбловчисининг ёпиқ режимда сўроқ ўтказиш илтимосини қондирди. Айбловчи МХХ ходимлари ўз фаолиятини конспирация принципи асосида олиб боришини бунга сабаб қилиб кўрсатди. Адвокат Сергей Майоров бу талабга қарши чиқиб, суриштирув олиб борган гувоҳни сўроқ қилиш учун ёпиқ режимда суд йиғилиши ўтказилиши борасида қонун йўқлигини таъкидлади. Шунга қарамай, суд давлат айбловчисининг талабини бажарди, иштирокчилар суд залини тарк этди.
Беш соатлик эшитувлардан сўнг соат 22:00 атрофида адвокатлар суд биносидан чиқди. «Газета.uz»га берган интервьюсида Сергей Майоров суд талабига биноан кўрсатма берган шахсларнинг исм-фамилиясини ошкор эта олмаслигини айтди.
Унинг таъкидлашича, сўроқ қилинганларнинг кўрсатмалари Абдуллаевнинг кўрсатмаларига зид келади. «Биз Бобомурод билан сохталаштирилган ёки ҳақиқий эмас деб ҳисоблаётган барча ҳужжатлар улар тўлақонли ва ҳақиқий деб тан олди», — деди Майоров.
Унинг сўзларига қараганда, терговчилар ҳужжатларни тайёрлашнинг шу йўли қулайлигини билдирган. «Айтайлик, кўрик баённомаси: унда 142 модда номлари ёзилади, лекин холислар ва таклиф қилинган мутахассис исмлари қўл билан ёзилади. Тушунарлики, баённома дастлаб тайёрланади, сўнг холис имзо қўяди. Яъни у қаршимда ўтиради, мен баённома тайёрлайман, лекин мен компьютерда унинг исмини ва манзилини ёзмайман, баённомани чиқарганимдан сўнг эса сана, вақт ва унинг маълумотларини ёзаман. Терговчилар буни нормал ҳолат ҳисобламоқда, мен эса буни фальсификация деб ҳисоблайман», — деди ҳимоячи.
Адвокатнинг билдиришича, бирор принципиал янги кўрсатма берилмаган. Унинг ҳикоя қилишича, терговчилар судланувчилар расман 29 сентябрда ушлангани, аммо тушунтириш хатлари 27 сентябрга оидлигини қуйидагича тушунтирган: «Бари жуда оддий. Уларни таклиф қилишган, улар ўз ихтиёрлари билан келган, ўз ихтиёрлари билан барча кўрсатмаларни берган ва шундан сўнг бемалол уйларига кетган. 29-санада эса уларни қўлга олишган. Барча гувоҳлар бир нарсани такрорлаяпти», — деди Майоров.
Маълум бўлишича, терговчилар бош ашёвий далил бўлмиш «Ўрим» лойиҳаси материаллари солинган флешка ишда кўрсатилмаган: «У ДХХда сақланмоқда. Бу флешкани олиб келишга ваъда беришди».
«Чарос Абдуллаеванинг кўрсатмаларига келсак, терговчиларнинг сўзларига кўра, у ўзи келган, тушунтириш берган, бунинг асосида Бобомурод Абдуллаев таклиф қилинган. У келганида ўзи ҳақида ҳаммасини айтиб берган: ‘Усмон Ҳақназаров’ эканини, мақолаларни тўнтариш учун ёзганини, ‘Ўрим’ ҳақида... Шунга қарамай, у ушланмаган, қўйиб юборилган. 29 сентябрда эса қўлга олинган», — тушунтирди адвокат.
Терговчиларнинг кўрсатмаларига биноан, бошқа судланувчилар — Равшан Салаев ва Шавкат Оллоёровлар билан ҳам худди шу воқеалар такрорланган.
Сергей Майоровнинг қайд қилишича, терговчилар ҳимоянинг барча саволларига тайёр бўлган. Кейинги мажлисда Чарос Абдуллаеванинг ДХХ биносига келиши акс этган видеокамера ёзувлари тақдим этилиши кутилмоқда.
Шавкат Оллоёровнинг адвокати Дилшод Жабборовнинг айтишича, сўроқ давомида тергов тадбирлари ўтказишда йўл қўйилган хатолар маълум бўлган. «Жиноий иш материалларидаги барча ишлар кўчирилган нусха бўлиб чиқди. Оригиналлар ДХХда сақланмоқда. Уларнинг кўрсатмаларида зиддиятлар йўқ эди», — деди у.
Кейинги йиғилиш 16 апрель куни очиқ шаклда ўтади.
Изоҳ (0)