Франциянинг авиакосмик, ҳарбий ва денгиз саноати учун ахборот тизимларини ишлаб чиқарувчи Thales International компанияси сунъий йўлдош ва сунъий йўлдош ускуналарини ишлаб чиқариш соҳасида Ўзбекистон билан ҳамкорлик қилишни мўлжалламоқда. Бу ҳақда «Газета.uz» хабар берди.
Комплекс космик тизимлар, жумладан, турли мақсадларга мўлжалланган сунъий йўлдошларни учириш ва бошқариш бўйича лойиҳаларни амалга ошириш режалаштирилмоқда.
Ўзбекистон ҳудудида маҳаллий мутахассисларни ўқитиш учун Thales International технологик базаси ташкил этилиши мумкин.
Бундан ташқари, компания Ўзбекистонга космик технологиялардан фойдаланган ҳолда юқори тезликдаги интернет тармоғига уланиш учун инфратузилмаларни ривожлантириш бўйича қўшма лойиҳани амалга оширишни таклиф қилди.
Эслатиб ўтамиз, жорий йил февралида президент Шавкат Мирзиёев «Ўзбекистон Республикасида космик тадқиқотлар ва технологияларни ривожлантириш чора-тадбирлари тўғрисида»ги фармойишни имзолаган эди. Унда мамлакатда космик ва сунъий йўлдош технологияларини жорий этиш концепциясини ишлаб чиқиш топширилган.
Изоҳ (0)