Қирғизистон чегарачилари Ўзбекистон фуқаросига уйида рўй берган ёнғинни ўчиришда ёрдам берди

Қирғизистон чегарачилари Ўзбекистон фуқаросига уйида рўй берган ёнғинни ўчиришда ёрдам берди. Бу ҳақда «Халқ сўзи» маълум қилди.

Қирғизистон Давлат чегара хизмати матбуот хизматига кўра, икки давлат чегарасига яқин жойда Ўзбекистон ҳудудидаги қишлоқдаги хонадонлардан бирида газ баллони портлаши оқибатида ёнғин келиб чиққан ва у кўз очиб-юмгунча бутун уйни қамраб олган.

Бу жой Қирғизистоннинг Жалолобод вилояти, Олабуқа тумани Тенги қишлоғига қўшни ҳудуд бўлган. Шунинг учун ёнғинни Олабуқа чегара отрядига тегишли «Кўксерек» чегара заставаси хизматчилари кўриб қолган. Тезда яқин орадаги Қирғизистон ҳудудидан оқиб ўтувчи анҳордан чегарагача сув ташиб бериш ташкиллаштирилган. Қардошлар кўмаги туфайли тез орада ёнғинни ўчиришнинг уддасидан чиқилган.

«Ўзбекистон ҳудудида уй ёнаётганини пайқаб қолдик, — дейди мазкур застава бошлиғи Адилет Исраил уули. — Лекин бу ҳудуддан чегара чизиғи ўтгани учун анҳордан чегарагача сув олиб келишни ташкил этдик».

У мамлакатларни ажратиб турувчи чегара чизиғи қўшни давлат фуқароларининг бир-бирига ёрдам беришига тўсқинлик қилмайди, деб ҳисоблашини таъкидлади.