Жиноят ишлари бўйича Наманган вилояти суди Суриядаги террорчилик ташкилотлари сафида жанговар ҳаракатларни амалга оширган саккиз нафар шахсга нисбатан ўз ҳукмини ўқиб эшиттирди, деб хабар берди «РИА Новости».
«Наманган вилояти Тўрақўрғон туманининг саккиз нафар фуқароси Суриядаги террорчилик ташкилотлари томонидан туриб жанговар ҳаракатларда иштирок этгани учун 6 йилдан 14 йилга қадар озодликдан маҳрум этилди», — дейди агентлик суҳбатдоши.
Унинг сўзларига кўра, судланган икки нафар фуқаро — Муҳаммад Абдурасулов ва Муҳаммадали Шокиров 2010 йилда Ўзбекистондан Туркияга чиқиб кетган ва у ерда «Таблиғи жамоат» халқаро террорчилик ташкилоти аъзоларининг таъсири остига тушиб қолган. Орадан икки йил ўтгач, улар Суриядаги лагерга бориб, ИШИДга алоқадор жанговар ҳаракатларда қатнашган.
«2016 йилда Абдурасулов ва Шокиров Ўзбекистонга қайтган ва 6 нафар фуқарони Суриядаги жанговар ҳаркатларда иштирок этишга жўнатган», — дейди суд вакили. Унинг сўзларига кўра, ушбу гуруҳга нисбатан ўтказилган тезкор-тергов ҳаракатлари давомида яна 30 нафар Ўзбекистон фуқаросининг Сурияга чиқиб кетишининг олди олинган.
Эслатиб ўтамиз, февраль ойида Тошкент вилояти Оққўрғон туман суди ИШИД террорчилик ташкилотига аъзо фуқаро Аҳрор Қосимовни 10 йилга озодликдан маҳрум қилганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)