Toshkent viloyati Oqqo‘rg‘on tuman sudi IShID terrorchilik tashkilotiga a’zo fuqaro Ahror Qosimovni 10 yilga ozodlikdan mahrum qildi. Bu haqda “O‘zbekiston 24” telekanaliga tayanib, “Gazeta.uz” xabar berdi.

Foto: “Gazeta.uz”

Qosimov Rossiya fuqarosi bo‘lgan IShID terrorchilik tashkilotining a’zosi Gajimurad Gaydarovning pasporti bilan O‘zbekiston hududiga kirayotganida Milliy xavfsizlik xizmati xodimlari tomonidan qo‘lga olingan. U qachon qo‘lga olingani ma’lum qilinmadi. MXX Qosimov Turkiyadan O‘zbekistonga yo‘l olayotganidan xabar topgach, uni qo‘lga olish bo‘yicha tezkor reja ishlab chiqqan.

O‘zbekiston fuqarosi Ahror Qosimov 2011-yilda ishlash maqsadida Turkiyaga jo‘nab ketgan. 2013-yilda o‘g‘rilik sodir etgani uchun Istanbul shahar sudi tomonidan 11 yil-u 6 oyga ozodlikdan mahrum qilingan. U qamoqxonada IShID tarafdorlari Hasan Dogushev, Aleksey Karabayev va Amirxon ismli shaxslar bilan tanishgan.

Qosimov sheriklari yordamida qamoqdan qochishga muvaffaq bo‘lgan va Istanbulning Kayashexir hududiga berkingan. U IShIDning yangi a’zolarini aeroportda kutib olish va ularni belgilangan manzilga yetkazish bilan shug‘ullangan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.