Тошкент шаҳар ҳокимлиги «Шавкат Мирзиёевнинг ташрифи олдидан тошкентлик тиббиёт ходимларининг хиёбонни тозалашга» мажбур қилингани ҳақида хориж ОАВларида пайдо бўлган ахборот юзасидан раддия берди.
Интернетда тарқалган хабарда тиббиёт ходимлари кечгача ишлашга мажбур қилингани, шунингдек, улар аллақайси хайрия жамғармаси учун 13 миллион сўм маблағ йиғиб бериши кераклиги айтилганди.
Ҳокимлик ахборот хизмати 2-болалар жарроҳлик касалхонаси бош шифокори Дониёр Собировга мурожаат қилганида, ҳақиқатан ҳам турли тиббий муассасалардан ходимлар «Ашхобод» боғини эмас, балки Яшнобод туман марказий поликлиникаси ҳудудини тозалаш бўйича тадбирларга жалб этилгани маълум бўлди. Ободонлаштириш ишлари поликлиника ҳудудида ўтказиладиган Сумалак тадбирига тайёргарлик доирасида олиб борилган.
Шунингдек, тиббиёт ходимларидан вақти-вақти билан қандайдир жамғармаларга пул маблағлари йиғиб олиниши ҳақидаги маълумот ҳам тасдиқланмади.
Тошкент шаҳар соғлиқни сақлаш бош бошқармаси раҳбари Улуғбек Эгамбердиев айтишича, республика давлат муассасалари ишчиларининг бир кунлик иш ҳақини ушлаб қолиш Вазирлар Маҳкамасининг ҳар йиллик фармойишига мувофиқ амалга оширилади.
Бир кунлик маошининг кўчирилишидан бош тортган ишчилардан пул ушлаб қолинмайди. Тўпланган маблағ «Маҳалла» жамғармасига ўтказилади, у эса пулларни хайрия мақсадларига йўналтиради.
Изоҳ (0)