«Ўзбекистон ҳаво йўллар» МАК 31 март куни баҳор ойининг охирига қадар «Тошкент — Нью-Йорк — Тошкент» йўналиши бўйича қатнайдиган рейсларнинг тариф қийматлари пасайтирилганини маълум қилди, деб хабар берди «Газета.uz».
Маълумотларга кўра, «S» тоифали эконом-класс чипларининг нархи бир томон учун 288 еврога қадар (минус 89 евро), иккала йўналиш бўйича эса — 496 еврогача (минус 125 евро) туширилган. Бироз қимматроқ бўлган «О» тоифали эконом-класс чипталари нархи 377 еврогача (минус 60 евро), иккала йўналиш бўйича — 621 еврога қадар (минус 100 евро) туширилган.
«Ўзбекистон ҳаво йўллари» жорий йилнинг 5 апрелидан бошлаб «Тошкент — Нью-Йорк — Тошкент» йўналишида иккинчи мунтазам қатновни йўлга қўяди. 29 майдан 17 сентябрга қадар эса ушбу йўналиш бўйича учинчи мунтазам қатновлар — ҳар сешанба куни амалга оширилади.
Тошкентдан Нью-Йоркка учувчи йўловчиларнинг катта қисмини Самарқанд шаҳри ва Самарқанд вилояти фуқаролари ташкил этганлиги сабаб, МАК 4 апрелдан 31 майга қадар «Самарқанд — Тошкент» рейсини ҳар чоршанба ва шанба кунлари махсус тариф ва Нью-Йорккача қайдномадан ўтиш билан йўлга қўяди.
Самарқанд аэропортидан учувчи йўловчилар ўз юкларини (агар ўриндиқлар мавжуд бўлса) Нью-Йоркка қадар рўйхатдан ўтказишлари (трансатлантик рейсдаги каби иккита ўриндиқ учун оғирлиги 23 килограмм бўлган юклар) ва Нью-Йоркка учувчи рейсга чиқиш талонини қўлга киритишлари мумкин.
Тошкент аэропортида транзит йўловчилар маҳаллий рейслар терминалидан халқаро рейслар терминалига шаттл-баслар ёрдамида етказилади.
Авиакомпаниядагиларнинг маълум қилишича, айни вақтда Нью-Йоркка учувчи шу турдаги рейсларни Ўзбекистоннинг бошқа аэропортларида ҳам очиш масаласи кўриб чиқилмоқда.
«Тошкент — Нью-Йорк — Тошкент» йўналиши бўйича парвозлар Boeing-787 Dreamliner самолётлари орқали амалга оширилади.
Изоҳ (0)