Ўзбекистонда жорий йил 1 апрелидан коммунал хизматлар, хусусан, электр энергияси тарифлари ошмоқда. «Халқ сўзи» нашри энергия нархининг кўтарилиши сабабларига ойдинлик киритиш мақсадида «Ўзбекэнерго» АЖ акциядорлик жамияти иқтисодиёт ва прогнозлаш бошқармаси бошлиғи Абдуҳамид Жўраевга мурожаат қилди.
Мутасаддига кўра, Ўзбекистонда ишлаб чиқарилаётган электр энергиясининг 90 фоизидан ортиғи иссиқлик электр станциялари улушига тўғри келади. Уларда электр токи ҳосил қилиш учун катта миқдорда газ, мазут, кўмир ва бошқа турдаги ёқилғи маҳсулотлари сарфланади. Ушбу ёқилғи маҳсулотлари нархининг ўзгариши эса ишлаб чиқарилаётган электр энергияси тарифига ҳам таъсир кўрсатади.
Абдуҳамид Жўраев 2018 йилдан эътиборан соҳада истеъмолчиларни гуруҳлаш соддалаштирилганини маълум қилди. Натижада электр энергияси тариф гуруҳлари сони аввалги 10 тадан 4 тагача қисқартирилди.
Қайд этилишича, яқин йилларда Навоий ИЭСда иккита 450, Тахиатошда иккита 280, Тўрақўрғонда иккита 450 мегаваттли замонавий энергоблоклар фаолият бошлайди. Юқори ҳамда паст кучланишли электр тармоқлари реконструкция қилинади. Инвестиция лойиҳаларини амалга ошириш орқали ишлаб чиқариш самарадорлиги оширилади. Бу эса электр энергияси тарифлари кескин ошиб кетишининг олди олишга хизмат қилади.
Эслатиб ўтамиз, Ўзбекистонда 1 апрелдан электр энергияси нархи салкам 12 фоизга ошади.
Изоҳ (0)